Kosmosqa attanatyn tuńǵysh ózbek ǵaryshkerine qoıylatyn talaptar jarııalandy
TAShKENT. KAZINFORM – Ózbekstannyń tsıfrlyq tehnologııalar mınıstrliginde Ózbekkosmos agenttigi jáne Zań shyǵarý palatasy depýtattarynyń qatysýymen dóńgelek ústel ótti, dep habarlaıdy Kazinform agenttiginiń Tashkenttegi menshikti tilshisi.
Jıynǵa qatysýshylar salanyń qazirgi ahýalyn, sondaı-aq alǵashqy ózbek ǵaryshkerin daıyndaý josparlaryn talqylady.
Agenttik basshysynyń orynbasary Mýhıddın Ibragımov atap ótkendeı, kosmosqa attanatyn tuńǵysh ózbekstandyq jalpyulttyq irikteý nátıjesinde tańdalady.
— Úmitkerler densaýlyq jaǵdaıy, bilimi men daıyndyǵy barlyq talapqa saı bolýy kerek. Bul rette, Halyqaralyq ǵarysh stantsııasynda jumys isteý úshin ol orys jáne aǵylshyn, al qytaılyq stantsııada bolý úshin qytaı jáne aǵylshyn tilderin bilýi kerek, - dedi ol.
Spıkerdiń aıtýynsha, fınalıster shetelde irikteýdiń ekinshi kezeńinen ótedi. Keıin negizgi jáne qosalqy quram jasaqtalady. Daıyndyq 10-12 aı boıy júrgiziledi.
— Tańdalatyn stantsııaǵa baılanysty oqý AQSh, Japonııa, Germanııada nemese Qytaıda ótýi múmkin. Artynsha olar karantınde bolady, keıin 10-14 kúnge ǵarysh keńistigine shyǵady, — dedi M.Ibragımov.
Ǵaryshker Jerge oralǵannan keıin ońaltýdan ótedi.
—Biz Ǵylym akademııasymen birlesip, ǵaryshta júrgiziletin zertteýlerdiń josparyn ázirleımiz. Ol klımattyń ózgerýi jáne ósimdik genetıkasy baǵyttaryn qamtıdy, - dedi Ózbekkosmos agenttiginiń bólim bastyǵy Hýmoıýn Rahmonov.
Eske salaıyq, buǵan deıin kosmosqa attanatyn tuńǵysh ózbek ǵaryshkeri ashyq konkýrs nátıjesinde tańdalatynyn jazyp edik.
Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.
Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.