«Kosmos-482» Jer orbıtasynan shyǵyp, Úndi muhıtyna qulady

ASTANA. KAZINFORM — «Kosmos-482» ǵarysh apparaty jer mańyndaǵy keńistikte 50 jyldan astam ýaqyt bolǵan. Ókinishke qaraı Úndi muhıtyna, Djakartanyń batysyndaǵy aımaqqa qulap, ǵarysh kemesiniń sapary támamdaldy, dep jazdy vz.ru.

1972 jyly ushyrylǵan «Kosmos-482» apparaty orbıtadan shyǵyp, Úndi muhıtyna qulaǵany týraly aqparat «Roskosmos» Telegram-arnasynda jarııalandy.

Sala mamandarynyń málimetinshe, apparat Máskeý ýaqyty boıynsha tańǵy 9:24-te atmosferanyń tyǵyz qabattaryna enip, Ortańǵy Andaman aralynan 560 shaqyrym batysqa qaraı ornalasqan núktede jerge tústi. Qulaý núktesi Djakartanyń batysynda ornalasqan.

«Kosmos-482»-niń orbıtadan shyǵýy Jer mańyndaǵy keńistiktegi qaýipti jaǵdaılar týraly eskertý júıesiniń avtomattandyrylǵan quraldarymen baqylanǵan.

Bul apparat Venerany zertteýge arnalǵan bolatyn, alaıda údetkish blogyndaǵy aqaýǵa baılanysty Jer orbıtasynan shyǵa almaı qaldy.

1972 jylǵy sátsiz ushyrylymnan keıin «Kosmos-482» Jerdiń ellıpstik joǵary orbıtasynda qalyp qoıdy. Ondaǵan jyl boıy onyń traektorııasy birtindep tómendep, aqyrynda baqylaýsyz túrde orbıtadan shyǵyp, muhıtqa qulady.

«VZGLıAD» gazeti jazǵandaı, «Roskosmos» baspasóz qyzmeti buǵan deıin «Kosmos-482» apparaty 9–10 mamyrda Jer atmosferasyna enip, qulaýy eshqandaı qaýip tóndirmeıtinin málimdegen bolatyn.

Buǵan deıin amerıkalyq ǵarysh sarapshysy Djonatan Makdaýel bul apparattyń 2019 jyly Jerge qulaıtyny jónindegi Batys basylymdarynyń boljamdaryn joqqa shyǵarǵan.

Aıta keteıik, buǵan deıin Roskosmosqa jańa basshysy taǵaıyndalǵan bolatyn.