Kosmetologııada qoldanylady: SQO-da 5,5 tonna qyzyl shaıan zańsyz aýlanǵan
PETROPAVL. QazAqparat – Soltústik Qazaqstan oblysynda zańsyz aýlanǵan 5,5 tonna artemııa salına shaıandary tárkilendi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 5-31 qazan aralyǵynda oblys aýmaǵynda «Brakoner» jedel-profılaktıkalyq sharasy ótti. Nátıjesinde 18 qylmystyq is qozǵaldy. Onyń 4-eýi artemııa salına shaıanyn zańsyz aýlaýǵa qatysty. Qyzyl shaıandy negizinen kosmetologııa men farmakologııada qoldanady. Bir aıdyń ishinde brakonerlerden 5,5 tonna sý jándigi alyndy. Olardyń memleketke qansha shyǵyn ákelgeni eseptelip jatyr.
«Qyzyl shaıandy zańsyz aýlaýdyń 3 deregi Taıynsha aýdanynda, 1-eýi Jambyl aýdanynda tirkeldi. Oblystaǵy artemııa salına kezdesetin barlyq tuzdy kólder jalǵa berilgen. Ol jerde jándikti aýlaýǵa ruqsat berilgen. Biraq jaldanyp jumys isteıtinderdiń keıbiri aýlanǵan shaıannyń bir bóligin tyǵyp alyp qalady. Kól basynan tıisti qujatsyz shyǵarmaq bolǵandar ustaldy. Olar endi 160 AEK mólsherinde aıyppul tóleýleri múmkin», - deıdi SQO PD jergilikti polıtsııa qyzmeti basqarmasy tabıǵatty qorǵaý tobynyń aǵa ınspektory Asqat Qojabaev.
Bir aıdyń ishinde ákimshilik jaýapkershilikke 176 adam tartylsa, sonyń 127-si ań aýlaý tártibin buzǵandar. 24 turǵyn zańsyz balyq aýlasa, 15-i qarý-jaraqty, oq-dárini satyp alý, paıdalaný saqtaý nemese tasymaldaý tártibin buzǵan.
«Qarapaıym qaýipsizdik sharalaryn saqtamaıtyndar kóp. Qaıyqty paıdalanatyn balyqshylar qutqarý keýdeshesin kımeıdi. Ańshylar qarýlaryn aldyn ala oqtap shyǵady. Kópshilik tabıǵat aıasynda mindetti túrde spırttik ishimdik ishedi», - deıdi polıtseıler.
Reıdtik sharalar bolashaqta da júıeli túrde ótkizilip turmaq.
