Kosmetıkalyq jáne kórkem tatý densaýlyqqa qaýipti me – sanıtar dárigerdiń jaýaby
PETROPAVL. QazAqparat – Sońǵy kezde sánge aınalǵan kosmetıkalyq jáne kórkem tatý V jáne S gepatıti, adamnyń ımmýn tapshylyǵy vırýsy sııaqty qaýipti aýrýlarǵa ákelýi múmkin, dep habarlaıdy QazAqparat tilshisi.
Soltústik Qazaqstan oblysy sanıtarııalyq-epıdemıologııalyq baqylaý departamentiniń bólim basshysy Gúlnara Jaqsylyqovanyń aıtýynsha, kórkem nemese kosmetıkalyq tatýdy qoldanbas buryn onyń saldaryn bilgen jón. Sterıldi emes jabdyqtardy qoldanýdan jara arqyly gerpes, V jáne S gepatıtterin, adamnyń ımmýn tapshylyǵy vırýsy sııaqty aýyr juqpaly aýrýlardy juqtyrý qaýpi joǵary.
«Sýretterdi meń, qalǵa jaqyn nemese onyń ústine salýǵa tyıym salynady, jaraqat qaterli isikterdiń damýyna sebep bolýy múmkin. Psorıaz, gerpes, dermatıt jáne basqa da teri aýrýlary bar adamdarǵa tatýırovka jasaýǵa bolmaıdy. Sondaı-aq, allergııasy barlarǵa kórkemdik nemese kosmetıkalyq tatýırovkany saqtyqpen qoldaný kerek. Ol sozylmaly allergııalyq reaktsııalardy týdyrýy múmkin. Boıaýlardyń komponentteri anafılaktıkalyq shok bolmaýy úshin aldyn ala tekseriledi. Jalpy sozylmaly aýrýlar asqynǵanda, dene qyzýy joǵarylaǵanda tatýırovka jáne tatýaj jasaýǵa bolmaıdy», - deıdi Gúlnara Jaqsylyqova.
Mamannyń aıtýynsha, júktilik kezinde tatýırovka men tatýaj jasaýǵa qatań tyıym salynady. Sondaı-aq, sozylmaly júrek aýrýlary, bronh demikpesi, epılepsııasy barlarǵa bolmaıdy, óıtkeni sýret salý kezinde aýyrǵannan ustamasy bastalyp nemese aýrýy órshýi múmkin.
«Kórkem nemese kosmetıkalyq tatýdy qant dıabeti, onkologııalyq aýrýlar, gemofılııa, qannyń uıýy, dáneker tininiń aýrýlary bolǵan jaǵdaıda múldem jasaýǵa bolmaıdy. Protsedýranyń aldynda alkogoldi ishimdikterdi qoldanýǵa tyıym salynady, óıtkeni alkogol usaq qan tamyrlaryn keńeıtedi, saldarynan qan ketýi múmkin. Tatý sýretin salýǵa qoldanylatyn sııada keıde ýly zattar men kantserogender bolady. Mysaly, kóptegen tatýırovka tústerinde teriniń qaterli isigin týdyratyn benzopıren bar. Qara sııada ekzema, dermatıt, allergııalyq reaktsııalar týdyratyn parafenılenodıamın bar. Tústi sııalarda aýyr metaldar men tıtan, qorǵasyn, kadmıı, nıkel, alıýmınıı, kobalt, hrom, myshıak sııaqty hımııalyq elementter jıi kezdesedi», - deıdi sanıtar dáriger.
Tatý jasaǵan jer eń keminde 10 kún aýyrady. Infektsııa túspeýi úshin ony qolmen ustaýǵa, qasýǵa, sýlaýǵa bolmaıdy.
«Óndirýshiler boıaý reńiniń ketpeı 15 jyl saqtalatynyna kepildik beredi. Biraq týsh, kún sáýlesinde kúıip ketetin organıkalyq ónim. Sondyqtan jańa tatýırovkany arnaıy kúnge kúıý quraldarymen qorǵaý qajet. Monshaǵa, saýnaǵa, basseınge barmaýǵa keńes beremin. Eger tatý jasatamyn dep sheshseńiz sertıfıkattalǵan jabdyqty paıdalanatyn, boıaýlarǵa ruqsat beretin qujattary, bir ret qoldanylatyn sterıldi shyǵyn materıaldary bar salondy tańdańyz. Tatý-salonnyń qyzmetkerleriniń arnaıy oqýdan ótken sáıkestik sertıfıkattary, belgilengen úlgidegi medıtsınalyq kitapshalary bolýy tıis», - deıdi Gúlnara Jaqsylyqova.
Jastyqpen nemese sánge eliktep salynǵan tatý ýaqyt óte kele unamaýy múmkin. Sanıtar dárigerdiń aıtýynsha, denege salynǵan sýretti lazerlik hırýrgııa arqyly óshirýge bolady. Bul protsedýra óte aýyr jáne qymbat. Tatýdy lazermen tolyq óshirý múmkin emes, orny tyrtyq bolyp qalýy múmkin. Sondyqtan, kosmetıkalyq nemese kórkem tatý salǵyzbas buryn onyń saldaryna da mán bergen jón.
