Qosqudyq aýylynda jańa mektep ashyldy
Buǵan deıin oqýshylar 1952 jyly salynǵan oqý oshaǵynda bilim alǵan. Mektep «Halyq ıgiligi» qoǵamdyq qorynyń qarjysyna salynǵan. Oǵan 750 mln teńge aqsha jumsalǵan. 767 adam turatyn bul aýylda 86 bala oqıdy. Al bıyl 1-synypqa 5 oqýshy qabyldanbaq.
Oqytý memlekettik tilde, bir aýysymda júrgiziledi. Munda 24 oqý kabıneti, 2 sheberhana, kompıýterlik synyp, 3 arnaıy kabınet (fızıka, hımııa, bıologııa), 3 ınteraktıvti taqta, akt jáne sport zaldary, 60 oryndyq ashana, oqý zaly bar kitaphana, medıtsınalyq kabınet bar. Mektepte 20 muǵalim qyzmet etedi.
Bilim oshaǵynyń ashylý saltanatyna oblys ákimi Marat Sultanǵazıev arnaıy qatysyp, turǵyndardy qýanyshty kúnmen quttyqtady.
«Barshańyzdy 2023-2024 oqý jylynyń bastalýymen, memleketimizdiń Konstıtýtsııasy kúnimen jáne jańa mekteptiń ashylýymen quttyqtaımyn!
Birer kúnnen keıin oblysymyzdaǵy 456 mektep esigin aıqara ashyp, 330 myńnan asa oqýshy oqý jylyn bastaıdy. Biz óz tarapymyzdan balalarymyzdyń óz zamandastarymen teń dárejede zamanaýı mektepterde bilim alýy úshin barlyq múmkindikti qarastyryp jatyrmyz», - dedi Marat Sultanǵazıev.
Óńir basshysynyń sózinshe, oqý ordasynyń bolýy jas mamandardy aýylǵa tartýǵa septigin tıgizedi.
«Bul mekenniń damý potentsıaly joǵary. Qasynda temirjol stansasy bar, oblys ortalyǵyna jaqyn ornalasqan. Jańa mektep boı kótergenine turǵyndar dán rıza bolǵanyn baıqadyq. Mektep – mańyzdy ınfraqurylymdyq nysan. Onyń arqasynda jas mamandardy, otbasylardy tartyp, aýylǵa jan bitirýge bolady. Bul - eldimekenniń damýyna tyń serpin bolary da anyq», - dedi oblys ákimi.
Sonymen qatar ol Qosqudyqta mektep ashylýyna uıytqy bolǵan Aldabergen Dáýren Qanatulyna alǵysyn bildirdi.
Saltanatty sharada Almaty oblysynyń burynǵy ákimi, qoǵam qaıratkeri Qanat Bozymbaev ta sóz aldy.
«Búgin – men úshin, bala-shaǵam úshin qýanyshty kún. Osy ýaqytqa deıin birneshe mektep salynyp jatqanda basy-qasynda júrdim. Úles qosyp júrsem de, dál qazirgideı tolqyǵan emespin. Óıtkeni osy aýylda ákem Aldabergen týyp-ósken.
Jańa mektepti ulym Dáýren salyp berip otyr. Onyń bul isi kóńilimdi kókke kóterdi. Aýyldyq mektepte balalar bilim alyp, ósedi degen úmittemiz. Olar osy jerden úlken ómirge qadam basady. Balalarymyz bolashaqta elimizdiń myqty azamattarynyń qatarynda bolatynyna senemiz», - dedi Qanat Bozymbaev.
«Halyq ıgiligi» qoǵamdyq qory mektep ujymyna Suzuki markaly avtokóligin syıǵa tartty. Budan bólek, qor kópbalaly, áleýmettik osal toptan shyqqan 12 balany mektepke daıarlap, qural-jabdyqtarmen, mektep formasymen qamtamasyz etti.
Jalpy Almaty oblysynda bıyl 15 750 oryndyq 16 mekteptiń qurylysy júrgizilgen. Onyń 9-y 1 qyrkúıekte ashylady. Olar:
• Almalybaq, Іrgeli orta mektepterine qosymsha 600 oryndyq japsarjaılar;
• Qonaev qalasynda 900 oryndyq mektep;
• Uzynaǵash aýyly;
• Kókqaınar, Boraldaı, Mejdýrechensk aýyldaryna ortaq mektep;
• Qaskeleń qalasy;
• Esik qalasy.
