Qoskólde jarty tonna móńke balyǵy qyryldy
PETROPAVL. QazAqparat – Soltústik Qazaqstan oblysy Aıyrtaý aýdanyndaǵy Kishi Qoskól kólinde balyq qyryldy, dep habarlaıdy QazAqparat tilshisi.
SQO ekologııa departamenti baspasóz qyzmetiniń málimetinshe, Kishi Qoskóldiń soltústik-batys jaǵalaýynan 500 keli óli balyq tabyldy. Ólgen balyq veterınarlyq zerthanaǵa jiberildi. Ol jerde móńkeniń neden qyrylǵanyn anyqtaý úshin saraptama jasalady. Mamandar sýdyń synamasyn da alyp, zertteıdi. Al kóldi jalǵa alýshy endi ony tazartyp, ólgen balyqtardy joıýy kerek.
Kól basyna ekologtarmen birge oblystyq orman sharýashylyǵy jáne janýarlar álemi aýmaqtyq ınspektsııasynyń, tabıǵı resýrstar jáne tabıǵatty paıdalanýdy retteý basqarmalarynyń ókilderi, Antonov aýyldyq okrýginiń ákimdigi jáne Aıyrtaý veterınarlyq stansasynyń mamandary bardy.
Buǵan deıin Taıynsha aýdanyndaǵy Shaǵlyteńiz kólinde balyq qyrylǵan bolatyn. Arnaıy qurylǵy sýqoımasy mańynda kúkirtsýtektiń mólsherden kóp bolǵany anyqtaldy. Balyqtyń naqty qyrylý sebebin vedomstvoaralyq komıssııa anyqtaıtyn bolady.
Mamyr aıynda M.Jumabaev aýdanyndaǵy Pıtnoe kólinde de balyq qyrylǵan edi. Ol joly 500 keli móńkeniń qyrylýyna kúkirtsýtektiń kóp mólsherde bólinýi sebep boldy.
