Qosymsha bilim berý salasynda ózgeris: balalar lagerlerine lıtsenzııa engiziledi
ASTANA. KAZINFORM – Balalar saýyqtyrý lagerlerin lıtsenzııalaý jáne qosymsha bilim berýdi retteý týraly jańa zań qabyldandy.
Memleket basshysy «Qazaqstan Respýblıkasynyń keıbir zańnamalyq aktilerine tarıhı-mádenı mura obektilerin qorǵaý jáne bilim berý-saýyqtyrý qyzmetteri máseleleri boıynsha ózgerister men tolyqtyrýlar engizý týraly» zańǵa qol qoıdy.
Qabyldanǵan túzetýler balalarǵa arnalǵan qosymsha bilim berýdi damytýǵa baǵyttalǵan jáne bilim berý-saýyqtyrý qyzmetterin kórsetetin jyl boıy jáne maýsymdyq statsıonarlyq balalar lagerleriniń qyzmetine qatysty.
2026 jyldan bastap qosymsha bilim berý uıymdary eki sanatqa bólinedi. Birinshi sanat — qyzmeti lıtsenzııalaýǵa jatatyn bilim berý-saýyqtyrý qyzmetterin kórsetetin uıymdar. Ekinshi sanat — habarlamalyq tártippen jumys isteıtin qosymsha bilim berý uıymdary. Mundaı tásil salany retteýdi jeńildetýge ári kórsetiletin qyzmetterdiń sapasy men senimdiligin arttyrýǵa múmkindik beredi.
Balalardyń qaýipsizdigi men qyzmet sapasyn qamtamasyz etý maqsatynda balalar lagerleriniń qyzmeti 2026 jylǵy 1 sáýirden bastap lıtsenzııalanatyn bolady. Bul balalardyń demalysy, oqýy jáne saýyqtyrýy úshin qoıylatyn biryńǵaı talaptardy belgileýge múmkindik beredi.
Lıtsenzııanyń qoldanylý merzimi bir jyldan bes jylǵa deıin uzartyldy. Bul uıymdarǵa túsetin ákimshilik júktemeni azaıtyp, qujattardy jyl saıyn qaıta rásimdeý qajettiligin boldyrmaıdy. Lıtsenzııanyń bes jylǵa berilýi uıymdardyń qyzmetiniń turaqtylyǵy men memlekettik baqylaýdy júıeli túrde júzege asyrý arasyndaǵy tepe-teńdikti qamtamasyz etedi.
Qabyldanǵan sharalar balalardyń demalysy, oqýy jáne saýyqtyrýy úshin qaýipsiz ári sapaly jaǵdaılar jasaýǵa, sondaı-aq elimizde bilim berý-saýyqtyrý qyzmetterin kórsetýdiń biryńǵaı standartyn qalyptastyrýǵa baǵyttalǵan.
Qazirgi tańda qosymsha bilim berý júıesi uıymdarynyń qyzmetin retteıtin tıisti normatıvtik quqyqtyq aktilerge ózgerister men tolyqtyrýlar engizý jumystary jalǵasyp jatyr.
Aıta ketelik Býrabaıda shetelde turatyn qazaq balalaryna arnalǵan etnolager ashylǵany týraly jazǵan edik.