Qosylǵan qun salyǵynyń shegi ósse, áleýmettik salaǵa qalaı áser etedi

ASTANA. KAZINFORM – Premer-mınıstrdiń orynbasary Tamara Dúısenova qosylǵan qun salyǵy shegin kóterýge qatysty pikir bildirdi.

- Bul usynys ázirge talqylanyp jatyr. Búgin Úkimet otyrysynda vıtse-premer Serik Jumanǵarın bıznes ókilderimen talqylaýǵa óńirlerge shyǵatynyn habarlady. Biz barlyq aımaqtyń, bıznestiń jáne basqa qurylymdardyń pikirin jınaımyz, sodan keıin sheshim qabyldanady, - dedi Tamara Dúısenova BAQ ókilderiniń saýalyna jaýap bere turyp. 

Osylaısha Úkimet basshysynyń orynbasary sońǵy ári naqty sheshimniń qabyldanýyn kútýdi surap otyr. 

- Jumys tobynyń usynystary men esebin kúteıik, sodan soń jalpy áleýmettik qorǵaý sharalary men áleýmettik salaǵa áseri týraly aıtýǵa bolady, - dep qysqa qaıyrdy vıtse-premer. 

Keshe Úkimet qosylǵan qun salyǵy mólsherlemesine qatysty jańa usynys aıtty. 

— Biz mynadaı tetikti qarastyrýdy usynamyz: jalpy belgilengen qosylǵan qun salyǵy mólsherlemesi 16%, aýyl sharýashylyǵy ónimderin óndirýshilerdi qosylǵan qun salyǵynan tolyq bosatý, al birqatar salalar úshin — 10% mólsherindegi aralyq mólsherleme. Osylaısha, Úkimet usynyp otyrǵan mólsherlemelerdi saralaý: 16%, 10%, 0% jáne bosatý, — dep túsindirdi Ulttyq ekonomıka vıtse-mınıstri Azamat Ámrın. 

Aıta keteıik, Memleket basshysy birer kún buryn bıznes ókilderimen kezdesýde qosylǵan qun salyǵynyń mólsherlemesi saralanyp belgilenýi tıistigin aıtqan edi.