Kóshirýge jol joq – Pavel Dýrov maqtaǵan qazaqstandyq startap ne týraly
ASTANA. KAZINFORM – Elordada Astana Hub Battle baıqaýy óz máresine jetti jáne halyqaralyq sarapshylar úzdik bastamalardy marapattady. Ásirese Telegram jelisiniń negizin qalaýshy Pavel Dýrov astanalyq startapshy Nuráli Sarbaqyshtyń «TrustExam» jobasyn erekshe atap ótken bolatyn. 25 jasar qazaqstandyq bilim salasynda emtıhannyń ádil ótýin qadaǵalaıtyn jobasy týraly keńirek aıtyp berdi.
Qazir joba Kanadada, AQSh-ta, Ulybrıtanııada jumys isteıdi jáne mıllıardtaǵan tabys ákeletin iri memlekettik kelisimsharttarǵa baǵyttalǵan.
– Jahandyq emtıhan ındýstrııasynyń kólemi 115 mlrd dollarǵa jetedi. Biraq munda eń keń taralǵan qubylys – kóshirý. Sondyqtan biz JI negizinde «TrustExam» jobasyn jasadyq, onda kompıýter men smartfondy ǵana paıdalaný arqyly iske asatyn qarapaıym nárseler men sheshimderdi usynamyz. Bes jyl buryn Qazaqstanda kásibimizdi bastadyq jáne qazir eldegi eki eń iri emtıhan ortalyǵyna qyzmet kórsetip otyrmyz. Budan keıin biz AQSh-taǵy Kremnıı alqabyna kóshtik, onda biz Stenford ýnıversıtetiniń StartX sııaqty túrli baǵdarlamalarmen jumys isteýge bolatynyn túsindik. Qazirgi tańda 2 mıllıon adam bizdiń qyzmetterimizdi qoldanady, taǵy 2 mıllıon adam osy jyly bizdiń qyzmetterdi paıdalanýǵa sheshim qabyldady, – dedi N. Sarbaqysh Astana Hub Battle baıqaýynda.
Qazaqstandyq startapshy jobasy qazir avtobýstar men taksılerdi júrgizýge lıtsenzııa alý úshin ártúrli emtıhan tapsyratyn 4 mıllıon halyqpen jumys isteıdi.
– Biz óz JI-modelimizdi oqyttyq, eki mıllıonnan astam emtıhan sessııalaryn júktedik, fýnktsıonal jasaqtadyq, sonyń arqasynda júıe GenAI kómegimen kúmándi is-áreketti anyqtaı alady, – deıdi spıker.
Sonymen birge, TrustExam jobasy 120 myń emtıhandy tegin ótkizedi, bul balalarǵa túrli olımpıadalar men baıqaýlarǵa daıyndalýǵa kómektesedi. Mysaly, Qazaqstanda aýyl balalaryna kodtaý boıynsha baıqaýǵa qatysýǵa múmkindik bergen.
Aıta keteıik, Pavel Dýrov jeńimpaz qazaqstandyq startapshydan sheberlik sabaǵyn alý keregin aıtqan edi.
Bıylǵy startaptar baıqaýǵa Qazaqstan, Ózbekstan, Ázerbaıjan jáne basqa elderden kelgen 80 startap ózderiniń ınnovatsııalyq jobalaryn tanystyrdy. Nátıjesinde alty joba jeńimpaz atandy jáne ár komanda 25 myń AQSh dollary kóleminde grant alady.