QR Prezıdenti: Kóshpendiler — týmysynan qaısar halyq

ASTANA. KAZINFORM – Memleket basshysy Qasym-Jomart Toqaev V dúnıejúzilik kóshpendiler oıyndarynyń saltanatty ashylýynda kóshpeli halyqtyń tarıhtaǵy róline toqtaldy. 

«Kóshpendiler qýatty qarý-jaraq pen ǵajaıyp zergerlik buıymdar jasap shyǵardy. Saq dáýiriniń Altyn adamdary sonyń aıqyn dáleli. Qazaq jerinen Ál-Farabı, Qoja Ahmet ıAssaýı syndy ǵulamalar shyqqan. Olar ilim-ǵylymnyń damýyna orasan zor úles qosty. Bizdiń babalarymyz alyp memleketter qurdy, úlken qalalar saldy. Uly Dalada Otyrar, Túrkistan, Taraz, Saraıshyq sııaqty sáýletti shaharlar boı kóterdi», - dedi Qasym-Jomart Toqaev dúbirli dodany resmı asha turyp.

Memleket basshysynyń málimdeýinshe, kóshpendi jurt Batys pen Shyǵysqa kópir bolyp, túrli mádenıettiń jaqyndasýyna áser etti.

«Osy jerde ejelgi Ǵun ımperııasy, odan soń Túrik qaǵanaty saltanat quryldy. Olardyń dańqty jolyn Altyn Orda men Qazaq handyǵy jalǵastyrdy. Kóshpendiler órkenıeti naǵyz kórneki órkenıet. Shyn máninde, kóshpendi halyqtar barlyq qurlyqta bar, olardyń izin Eýropa men Azııadan, Afrıkamen Amerıkadan kórýge bolady. Kóshpendilerdiń mádenıeti, rýhanı qazynasy, qundylyqtary ortaq. Kóshpendi halyq eń aldymen rýhy azat jurt. Kóshpendiler úshin ómir máńgilik qozǵalys. Olardyń ár qadamy jańa álemde jasalǵan jasampaz qadam. Biz ejelden qonaqjaı halyqpyz, jańalyqqa jany qumar, túrli mádenıetke ashyq jurtpyz. Bizdiń ómir saltymyz tabıǵatpen erekshe úılesim tapqan. Kóshpendiler týmysynan qaısar halyq», - deıdi Prezıdent.

Buǵan deıin Qasym-Jomart Toqaev kóshpendiler órkenıeti dúnıejúzi tarıhynda óshpes iz qaldyrǵanyn aıtty.