Kóshpendiler Parıjde: Oıynnyń ambassadory kólikpen Frantsııaǵa jetti
PARIJ. KAZINFORM — Olımpıada oıyndary qarsańynda Frantsııa astanasy Parıjge Qazaqstannan kóligi 5-shi Dúnıejúzilik kóshpendiler oıyndary stılinde bezendirilgen sport jankúıeri jetti. Ony qazaqstandyq qoǵam qaıratkeri, saıahatshy, Astanada ótetin 5-shi Dúnıejúzilik kóshpendiler oıyndarynyń Brend-ambassary Erik Shynybekov tizgindep keldi.
Kóshpendi Erik Shynybekov Olımpıada oıyndarynda qazaqstandyq sportshylardy qoldaý maqsatynda Parıjge Atyraý qalasynan shyǵyp, Reseı, Grýzııa, Túrkııa, Grekııa, Italııa jáne Germanııa elderi arqyly júrip ótken.
Osy mıssııasy aıasynda 5-shi Dúnıejúzilik kóshpendiler oıynyn nasıhattap, oıyn úlgisinde kóligin bezendirý arqyly otandyq sportqa degen adaldyǵyn, janashyrlyǵyn bildirmek bolǵan.
Kóliktiń artqy esiginde dala fonynda búrkit ushyryp turǵan búrkitshi beınelengen.
Dúnıejúzilik kóshpendiler oıyndarynyń ótkiziletin kúnderi men (8-13 qyrkúıek) oıynnyń resmı saıty wng.kz kórsetilgen. Sondaı-aq, kóliktiń eki jaǵyna saıystyń resmı logotıpiniń sýreti salynǵan.
«Meniń oıymsha, Eriktiń uıymdastyrǵan aktsııasy onyń kóshpendilik bolmysyn burynǵydan da asha túsedi. Sonymen qatar, 5-shi Dúnıejúzilik kóshpendiler oıyndaryn nasıhattaýdy uıymdastyrýshylar, memlekettik mekemeler, sporttyq uıymdar ǵana emes, Qazaqstannyń kez kelgen azamaty, sport jankúıerleriniń de belsene kiriskenin kórsetedi. Biz osyndaı janashyrlarymyzdyń arqasynda álemdegi eń iri sport jáne mádenıet ortalyqtarynyń biri Parıjde jahandyq kóshpendiler mádenıetin tanystyrý múmkindigine ıe bolǵanymyzǵa qýanyshtymyz. Bul bizdiń muramyzdy álemge jarııalaýdyń jáne jankúıerlerdi 5-shi Dúnıejúzilik kóshpendiler oıyndaryna shaqyrýdyń tamasha múmkindigi», — dedi oıyndar dırektsııasynyń marketıng jónindegi dırektory Serik Býksıkov.
Parıj turǵyndary men qonaqtary kólikti syrtynan tamashalap qana qoımaı, Oıyndar týraly kóbirek bilýge jáne kóshpeli halyqtardyń tarıhy men dástúrimen tanysýǵa múmkindik aldy.
Óz kezeginde, DKO uıymdastyrý komıteti Parıjdegi Olımpıada oıyndarynda Qazaqstan quramasyna shyn júrekten sáttilik tilep, qazaqstandyq sportshylardyń el namysyn abyroımen qorǵaıtynyna senim bildiredi.
Aıta keterligi, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi.
Іs-sharaǵa 89 elden 2000-nan astam sportshy qatysady dep josparlanyp otyr.
