Kóshpendiler oıynynda ovarıden olja salýǵa múmkindigimiz bar – Serik Aqtaev
PAVLODAR. KAZINFORM - Pavlodar oblysynyń sportshylary V Dúnıejúzilik kóshpendiler oıynynda asyq atý, ordo, ovarı, qurash jáne aba boıynsha el namysyn qorǵaıdy. Jalpy óńirden 7 sportshy jáne birneshe tóreshi qatysady dep kútilip otyr.
Ertis-Baıan óńiriniń sportshylary Dúnıejúzilik kóshpendiler oıynyna bilek sybanyp daıyn otyr. Sportshylar asyq atý, ordo (asyq atýǵa uqsas oıyn), qurash (qyrǵyz kúresi), aba (túrki kúres túri) jáne ovarı boıynsha synǵa túsedi.
Atap aıtqanda, Aqtaev Serik pen Ernur Mereshev ovarıdan, Jomart Nurlanov pen Kerim Jazdyqbaı asyq atýdan, Saıat Qızat ordodan, aba boıynsha Muhtar Dálelhanuly, qurashtan Altynaı Nurhanova jarys jolyna qosylady.
Toǵyzqumalaqtan 3 dúrkin álem chempıony, QR Eńbek sińirgen sport sheberi Serik Aqtaev otandyq oıynshylardyń ovarıden olja salatyn múmkindigi zor dep esepteıdi.
- Ovarıdi 2008 jyldan beri oınap kelemin. Ovarı toǵyzqumalaq tektes oıyndarǵa jatady. Oıyn taqtasynda 12 otaý, 2 qazan, 48 tas bolady. Negizgi maqsaty 25 tas jınap, qarsylasty utý. 24 tastan shyqsa, teń oıyn bolady. Qarsylasta júris taýsylǵan kezde ony júrýge májbúrleý taktıkalary da qarastyrylǵan. Bul oıyn Afrıka elderinen shyqqan. Bıylǵy jarysqa álemniń úzdik ovarı oıynshylary qatysady,-dedi sportshy Kazinform tilshisine bergen suhbatynda.
S.Aqtaev sońǵy 16 jylda ovarıden álemdik deńgeıde ótken 24 halyqaralyq jarysqa qatysyp, sonyń teń jartysynda jeńimpaz atanǵan. Al ózgesinde úzdik úshtikten tómendep kórmepti. Sportshy negizgi maqsat - 8-13 qyrkúıek kúnderi Astana qalasynda ótetin Dúnıejúzilik kóshpendiler oıyndarynda QR qurama komandasy qatarynda barynsha táýir oıyn órnegin kórsetý deıdi ol.
Al Qaıyrbaev atyndaǵy ulttyq klýbtyń dırektory Darhan Jolamanov óńirimizdiń sportshylary babynda ekenin aıtady.
Buǵan deıin Dúnıejúzilik kóshpendiler oıyndarynda sportshylarǵa qandaı as máziri usynylatyny týraly jazǵan edik.
