Kóshpendiler oıynyn ótkizýge qansha qarjy jumsalady

ASTANA. KAZINFORM – Bıyl kúzde (8-12 qyrkúıek) Astanada V Dúnıejúzilik kóshpendiler oıyndary ótedi. Onda 89 elden kelgen oıynshylar sporttyń 21 túrinen baq synaıdy.

«Oıyndardyń jalpy operatsııalyq bıýdjeti - 5,7 mlrd teńge. Iá, bul aýqymdy qarjy, biraq 2011 jyly ótken jetinshi qysqy Azııa oıyndarynyń bıýdjeti 20 ese kóp bolǵanyn eske salǵym keledi. 2017 jyly Almatyda ótken Ýnıversıadanyń bıýdjeti bes ese kóp boldy. Atalǵan somaǵa bizdiń qarjylyq seriktesterimiz ben demeýshilerimiz qosatyn qarajat qosylady. Jalpy alǵanda, operatsııalyq bıýdjet shamamen 8 mlrd teńge», - dedi V Dúnıejúzilik kóshpendiler oıyndaryn daıyndaý jáne ótkizý dırektsııasynyń basshysy Naıl Nurov.

Sondaı-aq, dırektsııa basshysy kóshpendiler oıyndary ótetin sport nysandaryna jóndeý jumystary júrgizilip jatqanyn aıtty.

«Astanadaǵy «Qazanat» ıppodromynyń júgirýge arnalǵan joldyń uzyndyǵy 12 metrge, eni 7 metrge keńeıe tústi. Sonymen qatar ıppodromda jylqylardy dıagnostıkalaý jáne qalpyna keltirý boıynsha jańa zerthana bolady. Odan bólek, «Alaý» muz saraıy jańaryp, kóshpendiler oıyndarynyń arqasynda jańa kelbetke ıe bolady. Jarystan keıin muz saraıy ádettegi jumys rejımine oralyp, konkıshilerdi qýantady. «Astana-Arena» fýtbol stadıony da jańartylyp jatyr, ıaǵnı ishki ınfraqurylymy, trıbýnalar men fýtbol alańy aýystyrylady», - deıdi ol.

Aıta keteıik, Astanaǵa kóshpendiler oıynyna 100 myńǵa jýyq týrıst keledi dep josparlanǵan. 

Dúnıejúzilik kóshpendiler oıyndary kezinde qazaq aýyly qurylady.