Kóshpendiler oıyny: Qyrǵyzdyń alysh kúresinen qazaq balýandary 8 medal enshiledi

ASTANA. KAZINFORM – Búgin 5-shi Dúnıejúzilik kóshpendiler oıyndarynda Jaqsylyq Úshkempirov atyndaǵy jekpe-jek saraıynda qyrǵyzdyń ulttyq belbeý kúresi alyshtan jarystar aıaqtaldy.

Nátıjesinde qazaqstandyq sportshylardan erler arasynda 60 keli salmaq dárejesinde Turmahanbek Qalmuqan jáne 100 keli salmaq dárejesinde Bekbol Nurlanuly kúmis júlde jeńip aldy.

Nurjan Sársenǵalıev (70 keli) pen Nurdáýlet Jarylǵapov (+100 keli) qola júldege qol jetkizdi. Al, áıelder arasynda 75 kelide otandasymyz Perızat Jaqypbekova kúmis júldege ıe bolsa, 55 kelide Nazerke Ábiltaeva, 60 kelide Araılym Rakısh jáne 65 kelide Aınur Aqjigitova qola medalǵa ıe boldy.

Dúnıejúzilik kóshpendiler oıyndarynyń baǵdarlamasyna alǵash ret engizilgen Powerful nomad sportynyń júldegerleri anyqtalǵanyn jazǵan bolatynbyz.