Kóshpendiler oıyny: Qazaqstan toǵyzqumalaqtan 5 medal jeńip aldy
ASTANA. KAZINFORM – V Dúnıejúzilik kóshpendiler oıyndarynyń toǵyzqumalaq básekesi Astana qalasyndaǵy «Dýman» qonaq úıinde óz máresine jetti.
Úsh kúnge sozylǵan básekede, ulttyq qurama sportshylary jalpy 5 medal enshiledi (3 altyn, 1 kúmis, 1 qola).
Erler arasyndaǵy jekeleı synda qazaqstandyq Beksultan Bostandyqov altyn, Ersultan Áýelbaı qola júlde aldy. Al qyrǵyzstandyq toǵyzqumalaqshylar kúmis jáne qola medaldy qanaǵat tutty.
Áıelder arasynda ulttyq qurama sportshysy Móldir Serikqyzy altyn, Ańsaǵan Qojanásip kúmis júlde enshiledi. Qyrǵyzstan sportshylary 2 qola medal ıelendi. Sondaı-aq, ulttyq qurama jalpy esepte 30,5 upaımen komandalyq altyn júldeni jeńip aldy. Ekinshi orynda – Qyrǵyzstan, úshinshi orynda – Reseı jáne Mońǵolııa.
Aıta keteıik, toǵyzqumalaq jarysyna álemniń 41 elinen 114 sportshy qatysty.
