Kóshpendiler oıyny: Berik Ýálı qusbegilerdiń daıyndyǵyn tekserdi
ASTANA. KAZINFORM - 5-shi Dúnıejúzilik kóshpendiler oıyndary qarsańynda Respýblıkalyq Qusbegilik federatsııasynyń prezıdenti Berik Ýálı ulttyq qurama sportshylarynyń qatysýymen jınalys ótkizdi. Basqosýda jahandyq dodada elimizdiń namysyn qorǵaıtyn qusbegilerdiń daıyndyǵy pysyqtaldy.
Elordada ótken jıynǵa Qusbegilik federatsııasynyń prezıdenti Berik Ýálı, vıtse-prezıdentter – Janjigit Omarhan men Baǵdat Múptekeqyzy, sondaı-aq atqarýshy dırektor Bazarbek Kýntýǵan jáne qusbegi sportshylar qatysty.
Kún tártibindegi basty másele – 8-13 qyrkúıek aralyǵynda Astanada ótetin 5-shi Dúnıejúzilik kóshpendiler oıyndarynda Qusbegilik saıysy boıynsha baq synaıtyn ulttyq quramanyń daıyndyǵy. Baıraqty básekede Qazaqstannyń namysyn qusbegilikten toǵyz sportshy qorǵaıdy. Olar, búrkit qusy boıynsha – Serikbek Kýntýgan, Erzat Baıkadamov, Arman Kýshkarov, qarshyǵa qusy boıynsha – Dáýren Arshabaı, Baǵdat Keýenov, Qudaıbergen Raýıluly jáne ıtelgi qusy boıynsha – Erlan Kenjetaev, Baqdáýlet Babajan, Ibragım Bazarbaev.
Joǵaryda aty atalǵan toǵyz azamat el ishindegi chempıonattarymyzda — júzden júırik shyqqan úzdikter. Jyl basynan beri ulttyq qurama sapyndaǵy qusbegiler úshin Almaty qalasy men Aqmola oblysynda eki oqý-jattyǵý jıyny ótken bolatyn. Úshinshi oqý-jattyǵý jıyny Astana qalasynda 27 tamyzdan 7 qyrkúıekke deıin jalǵasady. Qazaqstandyq sportshylardyń Kóshpendiler oıyndaryna daıyndyǵy federatsııa prezıdentiniń jeke baqylaýynda.
«Elimizdiń tórinde tórtkúl dúnıe kóz tikken úlken shara ótkeli jatyr. Osy dúbirli dodada el týyn senip tapsyrǵan sportshylarymyzǵa federatsııa atynan sáttilik tileımin. Shapqan attyń tuıaǵy, ushqan qustyń qanaty talatyn ulan-ǵaıyr dalanyń ıesin, qyran baptap, qus salǵan begzada ónerdiń kıesin tanytatyn sátte aıanyp qalmaıyq. Memleket basshymyzdan bastap búkil el bizge senim artyp otyr», - dedi «Qusbegilik» federatsııasynyń Prezıdenti.
Sonymen qatar, Berik Ýálıdiń tóraǵalyǵymen ótken jıynda medaldik mindettemeler men qosymsha syıaqy mólsheri jarııalandy.
Belgili bolǵandaı, V Dúnıejúzilik kóshpendiler oıyndary dırektsııasynyń atynan jeke sport túrlerinde jeńimpazdar – birinshi oryn úshin 500 myń teńge, ekinshi oryn ıelengender – 300 myń teńge, qola júldeger – 200 myń teńgeden alady.
Budan bólek, dúbirli dodada qusbegilikten Qazaqstan qorjynyna medal salǵan ulttyq qurama múshelerine Federatsııa prezıdentiniń atynan arnaıy syıaqy beriletini aıtyldy. ıAǵnı, birinshi oryn úshin – 1 000 000 teńge, 2-orynǵa – 500 000 teńge, 3-orynǵa – 300 000 teńge báıge tigilip otyr.
Esterińizge sala ketsek, «Qusbegilik» sport túrinen jarys qyrkúıektiń 12-13 kúnderi Astananyń etnoaýyl aýmaǵynda ótedi.
