Kóshpendiler oıyndarynyń jeńimpazy: Sadaq atý sportyna kelýime basty sebepker - kelinim

- Sadaq atýmen aınalysyp júrgenime 2 jyl boldy. Byltyr Koreıada ótken álemdik deńgeıdegi jarysta 1-oryn alǵan edim. Al bıyl Astanada chempıondar lıgasy degen ataýmen ótken irikteý jarysynda ekinshi oryn alyp, Kóshpendiler oıyndaryna qatysý múmkindigine ıe boldym. Sol ýaqyttan daıyndyqty bastap kettik. Qyrǵyzstanǵa baryp ta oqý-jattyǵý ótkizdik. Óıtkeni, bul eldiń qysqy aýa raıy bizden bólek. Biraz qıyndyqtan óttik. Almatyda da jattyǵý jasadyq. Mine nátıjesinde Kóshpendiler oıynynda jeńimpaz atandym, - dedi Aıash Qabdollaeva agenttik tilshisine bergen suhbatynda.

Dástúrli sadaq atý sportymen aınalysqanyna nebári 2 jyl bolǵan sportshy qol qalt etkende jattyǵý jasaıtynyn aıtady.

- Jalpy, úıde úzdiksiz jattyǵamyn. Bir kúnimdi bos jibermeýge tyrysamyn ýaqyt tabylsa sadaǵymdy alyp, jarty saǵat, 2 saǵat daıyndala beremin. Sonyń nátıjesi ǵoı. «Eńbek etseń erinbeı, toıady qarnyń tilenbeı», degen osy, - dedi ol.

Aıash Qabdollaeva sadaq atý sportyna kelýine kelini sebepker bolǵanyn atap ótti.

- Birinshi sebepker kelinim – Ajar. Odan keıin joldasym men qurama jattyqtyrýshysy Dıas Ahmetov aqyl-keńes berip otyrady. Úsh jattyqtyrýshynyń arqasynda osyndaı nátıjege jetip otyrmyn. Al basty qoldaýshym – otbasym. Emin-erkin júrýime, jattyǵýyma úlken kómegin tıgizip otyr. Sadaq atý sportymen kez kelgen jasta aınalysýǵa bolady. Jasqa esh shekteý joq, sportty jaqsy kórseńiz, sportqa mahabbatyńyz oıansa, nege aınalyspasqa... Alda áli talaı jarystar bar, solarǵa qatysyp úzdik nátıje kórsetý oıda bar. Ázirshe sportty tastaý oıymda joq. Biraq, nemereler de sabaqqa bardy. Tańdaý jasaýǵa kelgende tarazy basy teń bolyp tur. Qoldan kelgenshe bul sportty tastamaýǵa tyrysamyn, - dedi sadaqshy.

Aıta keteıik, búgin elordadaǵy Táýelsizdik saraıynda Memleket basshysy Qasym-Jomart Toqaev VI Dúnıejúzilik kóshpendiler oıyndarynyń jeńimpazdaryn marapattady.