Kóshpendiler oıyndarynyń nátıjesi ádil boldy — Toqaev

— Eń aldymen barshańyzdy Kóshpendiler oıyndaryndaǵy jarqyn jeńisterińizben shyn júrekten quttyqtaımyn. Sizder shyn máninde tamasha óner kórsetip, Qazaqstannyń ulttyq sporttaǵy abyroı-bedelin dúnıejúzine pash ettińizder. Álemniń 100-den astam elinen kelgen sportshylarmen básekege túsip, kók baıraǵymyzdy bıikke kóterý — naǵyz ult perzentterine tán asyl qasıet. Ulttyq komandamyz el úmitin tolyǵymen aqtady dep aıtsaq, ádiletke saı sóz bolady. Men Prezıdent retinde barshańyzǵa Otanymyzǵa ákelgen rýhty jeńisterińiz úshin shynaıy rızashylyǵymdy bildiremin. Sizderge tutas halqymyz jankúıer boldy. Men de bul dodany muqııat baqylap, qarap otyrdym, — dedi Memleket basshysy.

Prezıdent birqatar eldiń basshylarymen birge Bishkekte salynǵan jańa stadıonda ótken Kóshpendiler oıyndarynyń kórkem de áserli ashylý rásimin tamashalaǵanyn aıtty.

— Memleket basshylary Qyrǵyzstan Prezıdenti Sadyr Nurǵojouly Japarovtyń barsha meımandarǵa kórsetken shynaıy qonaqjaılyǵyna rıza bolyp, alǵysyn bildirdi. Osyndaı mańyzdy jarysta ulttyq quramamyzdyń jalpy esepte birinshi orynǵa shyqqany bárimiz úshin qýanyshqa toly jetistik boldy. Saıys qorytyndysy boıynsha sportshylarymyz 74 medal enshiledi, onyń 32-si — altyn júlde. Osy tamasha jeńis qazaqtyń rýhy bıik, jigeri myqty naǵyz jeńimpaz ult ekenin taǵy bir márte aıqyn kórsetti. Jalpy, sporttyń basty mıssııasynyń biri — ózara qurmet pen syılastyqty dáripteý, halyqtar dostyǵyn nyǵaıtý. Bul dúbirli doda joǵary deńgeıde ótti, saıys nátıjesi ádil boldy. Osyǵan oraı Qyrǵyz eliniń Prezıdentine rızashylyǵymdy bildiremin, — dedi Qasym-Jomart Toqaev.

Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.