Kóshpendiler oıyndaryndaǵy medal daýy: Qazaqstannyń jalpy eseptegi jeńisinen keıin pikir qaıshylyǵy týdy
ASTANA. KAZINFORM — Qyrǵyzstannyń Mádenıet, aqparat, sport jáne jastar saıasaty mınıstrligi VI Dúnıejúzilik kóshpendiler oıyndaryndaǵy qorytyndy medal esebine qatysty pikir bildirdi. Bul másele Qazaqstan men Qyrǵyzstan arasynda daý týǵyzǵan bolatyn, dep jazdy Sports.kz.
Mınıstrlik ókilderiniń aıtýynsha, Kóshpendiler oıyndarynyń tujyrymdamasyna sáıkes, jarys qorytyndysy boıynsha elder arasynda resmı medal jáne jalpykomandalyq esep júrgizilmeıdi.
— Dúnıejúzilik kóshpendiler oıyndary — eń aldymen etnosport pen dástúrli sport túrlerin saqtaý, damytý jáne keńinen nasıhattaýǵa, sondaı-aq halyqtar arasyndaǵy mádenı baılanys pen dostyqty nyǵaıtýǵa arnalǵan halyqaralyq alań. Oıyndardyń tujyrymdamasy memleketterdiń jalpy reıtıngtegi oryn úshin básekesine emes, ortaq tarıhı-mádenı mura tóńireginde elderdi biriktirýge negizdelgen. Sondyqtan Oıyndar qorytyndysy boıynsha memleketter arasynda jalpy medal reıtıngi jasalmaıdy, — dep málimdedi vedomstvo.
Eske sala keteıik, Qyrǵyzstannyń Bishkek qalasynda ótken VI Dúnıejúzilik kóshpendiler oıyndarynda Qazaqstan quramasy 74 medalmen birinshi oryn alǵan bolatyn. Qazaqstandyq sportshylar 32 altyn, 20 kúmis jáne 22 qola medal jeńip aldy.
Alaıda keıin World Nomad Games 2026 oıyndarynyń resmı Instagram paraqshasynda medal esebiniń basqa nusqasy jarııalandy. Onda Qyrǵyzstan 30 altyn, 29 kúmis jáne 13 qola medalmen birinshi orynǵa, al Qazaqstan 20 altyn, 16 kúmis jáne 19 qola medalmen ekinshi orynǵa qoıylǵan. Bul nusqada Qazaqstannyń medal sany 10-ǵa az kórsetilgen.
Keıin atalǵan jazba Instagram paraqshasynan óshirildi.
Osydan keıin Qyrǵyzstan tarapy oıyndarda elder arasyndaǵy resmı medal reıtıngi múlde júrgizilmeıtinin málimdedi.
