Kóshpendiler oıyndarynda el namysyn qorǵaǵan 53 saıys attyń 27-si ǵana talapqa saı boldy - jylqytanýshy

ASTANA. KAZINFORM –Ulttyq sport joǵary mektebiniń bir jyldyq jumysyn qorytyndylaǵan jıynda elimizde sportqa jaramdy attardyń tapshy ekeni aıtyldy.

Jıynda belgili jylqytanýshy, ǵylym doktory Nábıolda Kıkebaev Astanada ótken V Kóshpendiler oıynyna daıyndyq kezinde elde halyqaralyq deńgeıdegi jarystardan júlde ilýge jaramdy jylqynyń tym tapshy ekenine kóz jetkizgenderin aıtty.

Oıyndardyń aldynda qurylǵan keshendi ǵylymı top kókpar, aýdaryspaq, jamby atý, teńge ilý sportynan saıysqa túsetin attardyń fýnktsıonaldyq daıyndyǵyna ǵylymı zertteý júrgizgen. Nábıolda Kıkebaev sol zertteýlerde anyqtalǵan problemalardy atady.

- Saıystarǵa iriktelgen 53 attyń 27-siniń ǵana jaǵdaıy «qalypty» dep baǵalandy. 19 attyń jasy 11-den asyp ketken. Bul at sportynda «kári» jas bolyp esepteledi. Úsh at aqsap keldi, taǵy úsh attyń býyndarynan zaqym tabyldy. Úsh attyń sińiri sozylǵan bolyp shyqty. Eki attyń arqasy ketken, tórt attyń tym aryq ekeni, eki attyń tuıaǵyna kútim qajettigi anyqtaldy. Ýaqty tyǵyz bolǵandyqtan osy aqaýlarǵa qaramastan iriktelgen quramdy jarysqa túgel jiberdik, shama kelgenshe emdep, baptap qostyq. Saıys attarynyń jemshóbine de qajetti deńgeıde kóńil bólinbeıtini belgili boldy. Sondyqtan ár attyń múmkindigine qaraı azyq mázirin jasap usyndyq, - deıdi jylqytanýshy.

Ǵalym jylqy sportyn ǵylymı negizde damytý bastamasy orta jolda qalmasa degen tilegin de aıtty.

- Ǵylymı jumystar kezinde salaǵa maqsatty túrde qarjy bólinbeıtinin, qaldyq prıntsıpimen ǵana baǵyttalatyny kórindi. Salany maqsatty túrde qarjylandyrý úshin keminde 1,3 mlrd teńge kerek. Sport saıystaryna jaramdy attyń tapshylyǵy bar. Respýblıka boıynsha 1921 at qana degen tym az. Eldegi ár aýdanda atshabar, at sportynyń bir mektebi, ol mekteptiń óz maneji bolý kerek. Osyny standartqa aınaldyrý qajet, - dedi Nábıolda Kıkebaev.

Osyǵan deıin Qostanaı jylqy zaýyty kókpar men aýdaryspaq attaryn suryptaýǵa kirisetini týraly jazdyq.