Kóshpendiler oıyndaryna qatysatyn sportshylar men jylqylarǵa 3 aı boıy tekserý júrgiziledi
ASTANA. KAZINFORM – Kúzde elordada ótetin V Dúnıejúzilik kóshpendiler oıyndary qarsańynda sportshylar men sporttyq jylqylardy sapaly daıarlaý úshin eki keshendi ǵylymı top quryldy. Olardyń biri atbegilikpen, ekinshisi ulttyq sport túrleriniń sportshylaryn daıarlaýmen aınalysady.
Toptardyń quramyna jetekshi ǵalymdar, veterınarlar, bıologtar, genetıkter, sondaı-aq sporttyq psıhologııa jáne medıtsına mamandary kirdi. Ǵalymdar oqý-jattyǵý jıyndary men jarystar ótkiziletin jerlerde sportshylar men sporttyq jylqylardyń fýnktsıonaldyq jáne psıhologııalyq jaı-kúıine monıtorıng júrgizedi.
«QR Ulttyq sport qaýymdastyǵynyń bastamasymen jáne QR Týrızm jáne sport mınıstrliginiń qoldaýymen alǵash ret keshendi ǵylymı toptar quryldy. Birinshi top tikeleı sportshylarmen aınalysady – olardyń fýnktsıonaldyq jaǵdaıy, jalpy dene shynyqtyrý daıyndyǵy tekseriledi, psıhodıagnostıka júrgiziledi, sodan keıin baryp jalpy jaı-kúıiniń qorytyndysy jasalady. Eger densaýlyǵynda qandaı da bir ózgerister bolsa, psıhodıagnostıka jáne sporttyq medıtsına boıynsha em-shara jasaımyz. Basty maqsat – sportshylarymyz kúzde Astanada ótetin Dúnıejúzilik kóshpendiler oıyndaryna joǵary deńgeıde daıyndalýy úshin olardyń densaýlyǵyn tekserý», - dep atap ótti QR Ulttyq sport túrleri qaýymdastyǵynyń keshendi ǵylymı tobynyń úılestirýshisi Baqytjan Esjanov.
Óz kezeginde keshendi ǵylymı toptyń jetekshisi, a.sh.ǵ doktory Nabıdýlla Kıkebaev sporttyq jylqylardyń jaǵdaıyn aıta kele, belgili qazaqstandyq ǵalymdardyń tutas toby jylqylardyń jem-shóbin jaqsartýǵa, janýarlardyń fýnktsıonaldyq jaǵdaıyn tekserýge múmkindik beretin zertteýler júrgizip jatqanyn atap ótti. Ol sondaı-aq bul toptyń jaqsy nátıje kórsetý úshin jarysqa qatysatyn jylqylardyń daıyndyǵy men tózimdiligin tekseretinin tilge tıek etti.
Keshendi ǵylymı toptar qazir kókpar, teńge ilý, aýdaryspaq, jamby atý, dástúrli sadaq atý sportshylarynyń qurama komandalarymen jumys istep jatyr.
«Biz sportshylardyń aǵzasyn tekserip, joǵary nátıjege jetý úshin qandaı dárýmender qabyldaý kerek, qalaı tamaqtanǵany durys ekenin anyqtaımyz. Sportshylardyń júrek jáne ishki organdarynyń bıorıtimin tekserip, tamaqtaryn da soǵan saı uıymdastyramyz», - dedi keshendi ǵylymı toptyń jetekshisi, p.ǵ.d., professor Anatolıı Qulnazarov.
Ǵylymı toptar Olımpıadalyq daıarlaý ortalyǵynyń bazasynda 3 aı boıy sportshylar men jylqylarǵa tekserý júrgizedi.
