Kóshpendiler oıyndary týraly promo-rolık túsirýge arnalǵan mobılograftar baıqaýy aıaqtaldy

ASTANA. KAZINFORM – V Dúnıejúzilik kóshpendiler oıyndary týraly promo-rolık túsirýge arnalǵan mobılograftar arasyndaǵy baıqaý aıaqtalyp, jeńimpazdar anyqtaldy. Bul týraly QR Prezıdentiniń keńesshisi – Baspasóz hatshysy Berik Ýálı málimdedi. 

Ol Facebook-tegi paraqshasynda úzdik dep tanylǵan vıdeorolıkterdi jarııalady.

«V Dúnıejúzilik kóshpendiler oıyndary týraly promo-rolık túsirýge arnalǵan mobılograftar arasyndaǵy baıqaý aıaqtaldy. Túrli áleýmettik jelilerde uly dala dúbirin jan-jaqty nasıhattap, belsendilik tanytqan qatysýshylardyń barlyǵyna uıymdastyrýshylar atynan alǵys aıtamyn. Saıysqa qatysqan 2,5 myńǵa jýyq úmitkerlerdiń ishinde alys-jaqyn shet memleketterden de atsalysqan azamattar bar. Arnaıy komıssııa kelip túsken árbir jumysty muqııat qaraı otyryp, baıqaýdyń qorytyndysyn shyǵardy», - dep jazdy Berik Ýálı. 

Baıqaýdyń qorytyndysy boıynsha, bas júlde Berikbol Aımyrzaǵa buıyrdy. Ekinshi orynǵa Amanqul Erasyl ıe bolyp, úzdik úshtikti Arman Turlybekov qorytyndylady. Rýslan Abjal esimdi qatysýshynyń jumysy tórtinshi orynǵa laıyq dep tanyldy. 

Júlde qory tómendegideı:

Gran-prı:

- sapar nemese is-shara barysynda Prezıdenttiń jeke mobılografy retinde bir kún jumys isteý.

- Memleket basshysynyń qoltańbasy qoıylǵan iPhone 15 Pro Max.

- Mobılografııaǵa arnalǵan jabdyqtar jıyntyǵy (jaryq, mıkrofon).

- 1 000 000 teńge.

- Prezıdenttiń gramotasy.

Ekinshi oryn: 1 000 000 teńge.

Úshinshi oryn: iPhone 15 Pro Max.

Tórtinshi oryn: 500 000 teńge.

Sondaı-aq basqa qatysýshylar da nazardan tys qalǵan joq. Atap aıtqanda, 5 jáne 20-oryn aralyǵyndaǵy júldege ıe bolǵan azamattarǵa yntalandyrý syılyqtary tabystalady.