Kóshpendiler oıyndary kezinde Astana kósheleri jabyla ma?

ASTANA. KAZINFORM – Ákimshilik polıtsııa komıtetiniń tóraǵasy Qaısar Sultanbaev qyrkúıek aıynda ótetin Dúnıejúzilik kóshpendiler oıyndary kezinde jol qozǵalysy qalaı retteletinin aıtty.

«Kóshpendiler oıyndary ótken kezde astanalyqtardyń kepteliste turý ýaqyty qanshalyqty uzarady?» - dep surady jýrnalıst baspasóz máslıhatynda.

Qaısar Sultanbaev bul is-shara kezinde elge ózge elderdiń birinshi basshylary deńgeıindegi tulǵalar qatyspaıtyndyqtan ShYU sammıti kezindegideı shekteýler bolmaıtynyn aıtty. 

«Iá, 8-14 qyrkúıek kúnderi Astanada Dúnıejúzilik kóshpendiler oıyndaryn ótkizý josparlanyp otyr. ıAǵnı, kóp sportshynyń kelýin kútip otyrmyz, shamamen 3 myńdaı adam. Olardyń bári osynda turady, jarystar da Astanada ótedi. Bul suraqty nege qoıyp otyrǵanyńyzdy túsinem. Jýyqta ǵana ShYU sammıti ótip, belgili bir máseleler boldy. biraq ol kezde arnaıy kúzetiletin memleket basshylary kóp kelgen bolatyn. Bul joly ondaı kúzeti bar tulǵalar bolmaıdy. Sondyqtan kóshelerdi jabý, kólik keptelisi sııaqty máseleler bolmaıdy dep oılaımyn», - dedi Qaısar Sultanbaev. 

Aıtýynsha, oıyndarǵa qatysatyn sportshylardy qala ishinde tasymaldaý syzbasy áli ázirlenbegen.

«Oıyndar jaqyndaǵan kezde syzbany jasaımyz. Ol úshin keletin sportshylar qaıda turatynyn aıqyndalýy kerek. Sonyń negizinde syzba jasap, sportshylardy tasımyz. Ol úshin kóshelerdi jabýdyń qajeti joq dep oılaımyn», - dedi komıtet basshysy.