Kóshpendiler oıyndary: elorda kóshelerin jóndeý qashan aıaqtalady
ASTANA. KAZINFORM – Astanada ótetin dúnıejúzilik kóshpendiler oıyndaryna oraı kóshelerge jóndeý jumystary júrip jatyr.
«Búginde «Qazanat» ıppodromy mańyndaǵy kóshelerge asfalt-beton tóseldi. Qazir jylý, jaryq, baılanys jáne basqa da ınfraqurylym tartylyp jatyr. Bul baǵyttaǵy jumystar 30 tamyzda aıaqtalady», - dedi Astana qalasy Kólik jáne jol-kólik ınfraqurylymyn damytý basqarmasy basshysynyń orynbasary Mereı Baıyrhan qalalyq máslıhattyń komıssııa otyrysynda.
Buǵan deıin habarlaǵanymyzdaı, elorda kósheleriniń elektrondy pasporty ázirlenip jatyr. Kóshelerdi tsıfrlandyrý jumystary aldaǵy qyrkúıekte aıaqtalady.
Aıta keteıik, búgin qalalyq máslıhatynda qurylys, ekologııa, kólik jáne turǵyn úı-kommýnaldyq sharýashylyq máseleleri jónindegi turaqty komıssııanyń otyrysy ótti.
Kún tártibinde Astana qalasy men mańyndaǵy turǵyn alaptarynda jol salý jáne jóndeý máseleleri qaraldy.
