Kóshpendiler oıyndary: Astanada atqa mingender sherýi ótti
ASTANA. KAZINFORM – Aldaǵy dúnıejúzilik kóshpendiler oıyndaryna oraı elordalyq bir top belsendi qala kóshelerin atpen aralady.
Tańerteń «Barys Arena» alańyna atqa mingen belsendiler jınaldy. Olardyń maqsaty – dúnıejúzilik kóshpendiler oıyndaryn nasıhattaý. Jınalǵan halyqtyń arasynan at sherýin uıymdastyrýshyny kezdestirdik.
«Uly dala dúbirine jaqyn qaldy. Bizdiń maqsat – kóshpendiler oıyndaryn nasıhattaý. Bul shara endi apta saıyn ótedi. Biz qazir atqa otyryp elorda kóshelerin aralap ótemiz. Aıta ketetin jaıt, bul jerge kásibı sportshylar emes, belsendiler jınalǵan, ıaǵnı atpen serýendeýge qumar jandar. Biz barsha jurtty kóshpendiler oıyndaryn kórýge shaqyramyz. Sebebi biz kóshpendi halyqpyz, óz ereksheligimizdi maqtan tutýymyz qajet», - deıdi Tengri Road saıahatshylar at klýbynyń negizin qalaýshy Saǵadat Temkenov.
Kóshpendiler oıyndaryn qoldaýshylar qala boıynsha 10 shaqyrymdy atpen júrip ótpek.
Aıta ketsek, alańǵa atpen serýendeýge qumar jandar jınalǵan. Atpen qatar tazy ıelerin de baıqadyq. Elorda turǵyndary men qonaqtary jylqy jáne tazy ıttermen sýretke túsýge talasyp jatyr.
Eske sala ketsek, dúnıejúzilik kóshpendiler oıyndary aıasynda «Birlik kerýeni» Jambyl oblysynan bastalǵany týraly habarlaǵan edik.
Búginde Astana qalasy dúnıejúzilik kóshpendiler oıyndaryna oraı bezendirilip jatyr.
