Kóshpendiler oıyndary: Álemniń 35 elinen keletin sadaqshylar qazaqstandyq ónimdi paıdalanady

ASTANA. KAZINFORM – Astanada ótetin V Dúnıejúzilik kóshpendiler oıyndaryna sanaýly kún qaldy. Búgingi tańda ulttyq qurama sportshylarshylary anyqtalyp, qatysýshylardyń barlyǵy derlik dúbirli dodaǵa saqadaı saı.

Dástúrli sadaq atýdan ulttyq qurama bas bapkeri Dıas Ahmetovtiń aıtýynsha, sadaq atý sport túri boıynsha elimizge 35 memleketten 200-den asa sportshy keledi. 

«Bizdiń sadaq atýshylarǵa Túrkııa, Qyrǵystan, Mońǵolııanyń mergenderi báseke týdyrary anyq. Frantsııa, Italııa, Ispanııa, Qytaı, Taıland, Irannan keletin sportshylar da óte myqty. Degenmen, bizdiń sportshylar da osal emes. Júldeden úmittimiz», - deıdi bas bapker Dıas Ahmetov. 

Oıynǵa halyqaralyq standarttarǵa saı jasalǵan 2000-nan asa oq daıyndalǵan. 

«Osy ýaqytqa deıin ulttyq qurama qural-jabdyqtardyń basym bóligin Túrkııa, Majarstan, Reseıden tapsyrys berip aldyrtatyn. Keıingi jyldary elimizdegi óndiris te jolǵa qoıyla bastady. Aldaǵy Kóshpendiler oıynyna otandyq ónim «Altyn jebe» atty tsehtyń shyǵarǵan oqtaryn qoldanamyz. Sol úshin halyqaralyq standarttarǵa saı jasalǵan 2000-nan asa oq daıyndap qoıdyq», - deıdi dástúrli sadaq atýdan ulttyq qurama múshesi Erbol Tapenov. 

Dástúrli sadaq atýdan Dúnıejúzilik kóshpendiler oıyndarynda el namysyn 10 sportshy qorǵaıdy. Ulttyq quramanyń músheleri de daıyndyq barysynda otandyq ónimdi paıdalanyp, jattyǵýlaryn pysyqtap jatyr.

Buǵan deıin agenttik tilshisi shetel sportshylarynyń dodaǵa qatysatyn janýarlaryn qalaı tasymaldaıtynyn anyqtaǵan bolatyn.