Kóshpendilerdiń ejelgi órkenıeti týraly fılm shyqty
ALMATY. QazAqparat – Almatyda «Kún basty» beıneler qupııasy» derekti fılminiń tusaýkeseri ótti, dep habarlaıdy QazAqparat tilshisi.
Kóshpendilerdiń ejelgi órkenıetine arnalǵan fılmniń rejısseri Bolat Omar.
Fılmde avtorlar Táńir sóziniń túpki maǵynasyna, shyǵý tegine úńilgen.
Túsirilim Almaty oblysynda 5 jyl túsirilgen.
«Fılm kóptegen suraqtarǵa jaýap beredi. Mysaly, nelikten qazaq jáne qyrǵyz oıýlaryndaǵy órnekter men fondardyń alańy birdeı, kóshpendiler men ejelgi grekterdiń oıýlaryn qandaı ıdeıa biriktiredi, nelikten Ortalyq Azııanyń kóshpendileri turmysta eki tústi arqandy paıdalanady, nelikten Vatıkan kardınaldary moınyna eki tústi arqanjip baılap júredi, t.b.», - deıdi Bolat Omar.
Onyń aıtýynsha, Táńir sózi túrkiniń «Tań» jáne ejelgi Egıpettiń kún qudaıynyń aty «Ra» sózderinen quralǵan.
«Tań – kúnshyǵys, Ra – ejelgi Egıpettiń kún qudaıy. Keıbireýler Táńir sózi tań jáne er sózderinen quralǵan degendi aıtady», - deıdi avtorlar.
Fılm 7 bólikke bólingen, onyń árbiri 13 mınýt jalǵasady. Kartına Tańbaly tastaǵy bes jarym myń jyl buryn tasqa qashap salynǵan sýretterden bastalyp, ejelgi órkenıetter týraly syr shertedi.
Avtorlardyń aıtýynsha, táńirshildik – birqudaılyqqa syıynatyn alǵashqy álemdik din ári býddızm, hrıstıan jáne ıslam dinderi bastaýyn sodan alady.
