Kóshpendiler oıynynyń kúmis júldegeri - Ulannyń jaýyngeri

ASTANA. QazAqparat - Túrikııa elindegi Iznık qalasynda ótken Dúnıejúzilik kóshpendiler oıynynda Ulttyq ulan jaýyngeri Elaman Qoıshybaev 80 kelige deıingi salmaq dárejesinde kúmis medal jeńip aldy, dep habarlaıdy QazAqparat.

Jarystyń sońǵy kúni palýandar qazaq kúresinen alty salmaq dárejesinde chempıondardy anyqtaý úshin bozkilemge shyqqan. Bul jarysqa álemniń 19 elinen 60-tan astam balýan qatysty.

Quqyqtyq tártip áskeriniń jaýyngeri Elaman Qoıshybaev kelisimshart boıynsha Aqtóbe qalasyndaǵy Ulttyq ulannyń 6655 áskerı bóliminde qyzmet etedi. Óziniń kásibı qyzmetinde ol jedel maqsattaǵy batalon quramynda qalanyń qoǵamdyq qaýipsizdigi men tártibin qamtamasyz etedi. Jarysta ol Úndistan, Túrikmenstan, Iran jáne Ázerbaıjan balýandaryna qarsy tórt jekpe-jekte jeńiske jetti.

«Men bala kezimnen sportpen aınalysamyn. Qazirgi ýaqytta kelisimshart boıynsha áskerı qyzmet atqarymyn. Sonymen qatar sporttyq jarystarǵa daıyndalyp jatyrmyn. Árbir azamat – óz Otanynyń qorǵaýshysy, dene shynyqtyrýǵa daıyn bolýy kerek dep sanaımyn. Ulttyq ulan basshylyǵy maǵan únemi qoldaý kórsetip, sportpen shuǵyldanýǵa jaǵdaı jasaıdy. Men búgingi jeńisti arnaǵan komandırlerime alǵys aıtqym keledi», - dep atap ótti Elaman.