Kóshpendiler oıynynda qazaqstandyq balýandar qazaq kúresinen 6 medal aldy

IZNIK. QazAqparat - Túrkııanyń Iznık qalasynda ótip jatqan Dúnıejúzilik kóshpendiler oıynynda qazaqstandyq sportshylar qazaq kúresinen 6 medalǵa qol jetkizdi, dep habarlaıdy QazAqparat tilshisi.

Budan buryn habarlaǵanymyzdaı, Marat Nyǵmatýllaev (60 keli) el quramasy qorjynyna alǵashqy altyndy salǵan bolatyn.

Odan keıin júlde qoryn Zarına Sarıpova (65 keli) taǵy bir altynmen tolyqtyrdy.

Al Elaman Qoıshybaev (80 keli) pen Raýza Nurmuhammetova (55 keli) kúmis júldege qol sozdy.

Bıyl «Qazaqstan barysy» ataǵyna ıe bolǵan Maqsat Isaǵabylov (80 keliden joǵary) pen Móldir Azamat (65 keliden joǵary) qola júldeni qanaǵat tutty.

Aıta ketsek, kókpardyń qyrǵyzstandyq nusqasy sanalatyn kókbórú sportynan fınalda Qazaqstan quramasy Qyrǵyzstanǵa jeńildi.

Sondaı-aq, búgin qazaqstandyq sportshylar kókpardan chempıon atandy .

Eske salsaq, budan buryn atalǵan dodada Qanat Qasymhan dástúrli sadaq atýdan « kúmis « aldy.

Kóshpendiler oıyndaryna álemniń 102 elinen 3 myńnan astam sportshy keldi. Qazaqstannyń atynan 50 sportshy kókpar, kókbórú, qazaq kúresi, dástúrli sadaq atý, jamby atýdan synǵa tústi.

Dúnıejúzilik kóshpendiler oıyny búgin máresine jetti. Dúbirli doda 2024 jyly Ázerbaıjanda ótkiziledi.