Kóshpendiler oıyndary: Kókpardan Qazaqstan komandasy fınalǵa nelikten shyǵa almady
ShOLPAN-ATA. QazAqparat - Keshe Dúnıejúzilik kóshpendiler oıyndarynda kókpardan Qazaqstan komandasy jartylaı fınalda ózbekstandyqtarǵa jol berip, úshinshi orynmen shektelgen bolatyn. Qazaqstan Kókpar federatsııasynyń prezıdenti Erlen Ospanov «QazAqparat» HAA tilshisine týrnır favorıti dep tanylǵan komandanyń nelikten utylyp qalǵanyn aıtty.
«Birinshiden, bizdiń komanda bir kúnde eki aýyr oıyn ótkizdi. Jartylaı fınalǵa shyǵý úshin AQSh quramasyn 20:9 esebimen, Krasnoıarsk komandasyn 15:3 esebimen jeńdi. Al jartylaı fınalǵa jetkenshe jigitter sharshap qaldy», - dedi E. Ospanov.
Ekinshi sebep retinde, federatsııanyń týrnırge negizgi emes, ekinshi qurammen kelgeni atap ótildi.
«Bul álemde keń taralǵan tájirıbe. Kóptegen halyqaralyq iri týrnırlerge komandalar shamasyn baıqaý úshin jastardy shyǵarady. Jigitterdiń barlyǵy 93-98 jyly týǵandar. Soǵan qaramastan, qazaqstandyqtar negizgi qurammen kelgen Ózbekstanǵa nebári bir upaımen ese jiberdi», - dedi E. Ospanov.
Aıta keteıik, barlyq komandalar týrnırge birinshi qurammen kelgen.
Kóshpendiler oıynynyń altynshy kúni qazaqstandyq sportshylar 20 medal ıelendi.
