Kóshpendiler oıyndary: Qazaq kókparshylary reseılikterdi oısyrata jeńdi
ASTANA. QazAqparat - Qyrǵyz Respýblıkasynda ótip jatqan III Dúnıejúzilik kóshpendiler oıyndarynda kókpardan Qazaqstan quramasy Reseıdiń Krasnoıarsk komandasyn oısyrata jeńdi, dep habarlaıdy QazAqparat tilshisi.
«Siz ben biz, ásirese qyrǵyzdar kútken kókpardan Ulttyq qurama búgin alǵashqy oıynyn Reseıdiń Krasnoıarsk komandasymen ótkizip, qarsylastaryn 15-3 esebimen oısyrata jeńdi», - deıdi QR Mádenıet jáne sport mınıstrliginiń Sport jáne dene shynyqtyrý isteri komıtetiniń baspasóz hatshysy Raýhan Tuǵumbaeva óziniń Feısbýk paraqshasynda.
Eske sala ketsek, buǵan deıin QR Mádenıet jáne sport mınıstrliginiń Sport jáne dene shynyqtyrý isteri komıteti III Dúnıejúzilik kóshpendiler oıyndary Qazaqstan kókparshylarynyń qatysatynyn rastaǵan bolatyn. Oǵan deıin birqatar BAQ betteri men áleýmettik jelilerde Qyrǵyz Respýblıkasynda ótip jatqan III Dúnıejúzilik kóshpendiler oıyndarynda kókpardan Qazaqstan quramasy jalǵa at ala almaýy sebepti oıynǵa qatysa almaıtyny týraly aqparat shyqqan edi.
