Kóshpendiler Olımpıadasy: Qazaqstan kókparshylary esesin qaıtara ala ma
ShOLPAN-ATA. QazAqparat - Erteń, 2 qyrkúıek kúni Ystyq kóldiń jaǵasynda III Dúnıejúzilik kóshpendiler oıyndary resmı túrde ashylady. Osy joly Qazaqstan óz komandasyn kúsheıtip, sportshylardyń sanyn úsh esege arttyryp otyr, dep xabarlaıdy QazAqparat tilshisi.
Bıylǵy oıyndar 37 ulttyq sport túri boıynsha ótedi. Sonyń ishinde kúres, sadaq atý, ıtpen ań aýlaý, at jarys, kókpar, asyq atý jáne taǵy basqa jarystar bar. Oıyndarǵa álemniń 60-tan astam elinen 2 myńǵa jýyq sportshy qatysady. Qyrǵyzstan eń úlken komandany shyǵaryp otyr. Sportshylar sany - 458 adam. Odan keıin Reseı - 235 sportshy, al Qazaqstan 129 sportshyny ákeldi. Osydan eki jyl buryn ótken oıyndarda qazaqstandyq komandada 75 sportshy bolǵan. Eki jyl buryn Qazaqstan quramasy úshinshi orynnan kórinse de, kókparshylarymyz qyrǵyz komandasynan ońbaı utyldy. Osy joly qazaqtyń jigitteri esesin qaıtarýdy kózdeıdi.
Qatysýshy memleketterdiń ishinde Aýǵanstan, Bolgarııa, Belarýs, Úndistan, Iran, Mońǵolııa, Qytaı, Pákistan, Polsha, Tájikstan, Túrikmenstan, Ózbekstan, AQSh, Ýkraına, Frantsııa, Shrı-Lanka jáne taǵy basqalar bar. Olardyń barlyǵy 594 medal úshin talasady. Sonyń ishinde 174 altyn, 173 kúmis jáne 247 qola medal bar. Dúnıejúzilik kóshpendiler oıyndarynyń syıaqy qory 26 mıllıon somdy qurap otyr. Bul qazirgi kýrspen 136,5 mıllıon teńge nemese 381,3 myń dollardy quraıdy.
Aıta keteıik, 2012 jyly Bishkekte ótken Túrki tildes elderi yntymaqtastyq keńesiniń II sammıtinde qyrǵyz eli Dúnıejúzilik kóshpendiler oıyndaryn ótkizetinin málimdegen bolatyn. Negizgi maqsat - túrki xalyqtary arasyndaǵy mádenı-rýxanı baılanysty nyǵaıtý. QR Prezıdenti Nursultan Nazarbaevtyń bastamasymen qurylǵan Túrki keńesi de osyny kózdeıdi. Atalǵan uıymnyń sońǵy sammıti 2015 jyly Astana qalasynda ótken bolatyn. Bıyl Qyrǵyzstan kezekti sammıtti Dúnıejúzilik kóshpendiler oıyndarymen oraılastyryp otyr.
Oıyndardyń resmı ashylý saltanaty Cholpan-ata qalasynyń ıppodromynda ótedi. Oǵan QR Prezıdenti Nursultan Nazarbaev ta qatysady. Uıymdastyrýshylar osy jolǵy ashylý saltanatyn erekshe ótkizemiz dep otyr. Kelesi kúni Túrki elderi yntymaqtastyq keńesiniń VI sammıti uıymdastyrylady. Bıyl túrki elderiniń tórttigi - Qazaqstan, Qyrǵyzstan, Túrkııa men Ázirbaıjanǵa Ózbekstan qosylady degen jospar bar. Sammıttiń taqyryby - "Jastar saıasaty men ulttyq sport túrleri salasyndaǵy yntymaqtastyq".
