Kóshpendiler izimen: Tarazdan kıeli Túrkistanǵa kerýen attandy
Jambyl oblysynyń Túrkistandaǵy kúnderi aıasynda «Uly Jibek joly. Tarıh qoınaýynan – túrkiler besigine» atty kósh túzegen kerýendi shyǵaryp salý saltanaty Qazaq handyǵynyń týyn tiktegen Kereı men Jánibek handardyń monýmenti aldynda ótti.
Sharaǵa zııaly qaýym ókilderi, óner ıeleri, qala turǵyndary men qonaqtary qatysty.
«Taraz – tarıhymyzdyń temir qazyǵy» - dep, Elbasy Nursultan Nazarbaev aıtqandaı, tarıh tereńinen tamyr alatyn rýhanı muramalarymyzdy jas urpaqqa dáriptep, amanattaý búgingi kúnniń mereıli mindeti.
Sharanyń basty maqsaty – XX ǵasyrdyń basyna deıin saqtalyp kelgen kerýen jolyn jańǵyrtý, Qytaı, Qazaqstan jáne Ortalyq Azııanyń qalalary men eldi mekenderin baılanystyryp otyrǵandyǵyn kórsetý, jahandyq órkenıet aıasynda ulttyq biregeılikti saqtaýdyń joldary retinde ulttyq mádenıet, ulttyq dástúrdi saqtaý, jańǵyrtý, Tarazdyń Ortalyq Azııadaǵy eń kóne qalalarynyń biri ekendigin aıshyqtaý túsý.
Kóshti shyǵaryp salý barysynda Kenen Ázirbaev atyndaǵy oblystyq fılarmonııanyń ónerpazdary ánnen shashý shashsa, Asqar Toqpanov atyndaǵy oblystyq qazaq drama teatrynyń shyǵarmashylyq ujymy teatrlandyrylǵan qoıylymdy kópshilik nazaryna usyndy. Osylaısha, qazaqy dástúrmen aq bata berilip, mádenı, rýhanı kerýen babalar izimen Túrkistan jerine attandy. Attanǵan kerýen-kúımeniń quramynda 10 túıe, 6 bota, 20 at, 3 at arba, 1 kerýen basy, 1 jyrshy, 1 batyr, 14 qyz-jigit bar.
Oblys ákiminiń bastamasymen, mádenıet, arhıvter jáne qujattama basqarmasynyń uıytqy bolýymen uıymdastyrylyp jatqan óńiraralyq mádenıet kúnderi aıasynda taǵylymdy sharalar da kópshiliktiń nazaryna usynylatyn bolady.
Aıta ketsek, Jambyl oblysynyń Túrkistan oblysyndaǵy kúnderi aıasynda eki kún boıy «Taraz – Uly dalanyń kóne shahary» atty jyljymaly kórme, oblystyq kitaphanalardyń «Ótkeni – ónege, búgini – bekem, bolashaǵy – jarqyn Jambyl óńiri» atty jyljymaly mádenı sharasy, «Tarazdan Túrkistanǵa Shashý» atty merekelik kontserti uıymdastyrylmaq.
