Kóshpeli sot otyrysy men kórneki sot protsesi tájirıbesine oralý mańyzdy - B. Beknazarov
Konferentsııa barysynda senator Bektas Beknazarov Ata zańda qaǵıdattary aıqyndalǵan sot bıligi jáne onyń tóńiregindegi reformalar týraly sóz sóılegen bolatyn. «Bizge quqyqtyq memlekettiń barlyq ınstıtýttaryna, sonyń ishinde ádilsot tóreligine azamattardyń senimin saqtaý ǵana emes, ony arttyra túsý mańyzdy. Mine, dál osy úshin buryndy keńestik kezeńde bolǵan tájirıbege, halyqtyq sot sekildi jekelegen tásilderge qaıta oralý qajet. Bul jerde men kóshpeli sot otyrystary, kórneki sot protsessteri sekildi qyzmet túrleri týraly aıtyp otyrmyn», - dedi senator. Onyń aıtýynsha, mundaı sharalardyń mindettiligin Konstıtýtsııalyq zańnamalarda da qamtyǵan abzalyraq. Óıtkeni, bundaı tájirıbe sot júıesine degen azamattardyń senimdiligin arttyra túsedi.
«Meniń oıymsha, dál osy sekildi Konstıtýtsııalyq zańnamada jergilikti sot basshylary men sýdıalaryn halyqpen júzdesýge mindettiligin bekitý oryndy. Búgingi kúni qazaqstanda kóptegen azamattar sot júıesiniń kemshilikteri týraly aıtý, sot aktileriniń ádiletsizdigi týraly pikirlerin bildirý, qarapaıym qyzmet etıkasyn óreskel buzatyn zań qyzmetkerlerine shaǵymdaný múmkindigine ıe emes. Sot óziniń basshysyna ǵana esep berýmen shektelmeı, óz óńiriniń buqara halqyna ashyq bola tússe ıgi. Jergilikti sot sýdıalarynyń halyqpen jıirek júzdesýin tıimdi uıymdastyrý arqasynda qoǵam tarapynan aıtylyp jatatyn kemshilikterge nazar aýdarýǵa, sot júıesine azamattardyń senimin arttyrýǵa qol jetkizýge bolady», - dedi depýtat B.Beknazarov.