Kóshpeli orkestr elordalyq ardegerlerdi Jeńis kúnimen quttyqtady
Búgin ardagerlerdiń qurmetine Astana qalasy ákimdiginiń memlekettik akademııalyq fılarmonııasynyń úrmeli aspaptar orkestri kóshpeli kontsert uıymdastyrdy. Atap aıtqanda, óner ujymy maıdangerlerdiń úıiniń aýlasynda áskerı-patrıottyq ánderdi oryndady.
«Bıyl 98-ge kelip otyrmyn. Men 1925 jyly 10 naýryzda dúnıege kelgem. Búginde 9 nemerem, 19 shóberem bar. Solardyń ortasynda júrip jatyrmyn. Sender, jastar aman bolyńdar! Senderdiń qurmetterińdi kórip, 98 emes, 25-ke kelgendeı bolyp otyrmyn. Men úsh soǵysty bastan ótkerdim. Germanııa, AQSh-Koreıa jáne Japonııadaǵy maıdanǵa qatystym. 17 jasymda soǵysqa attanyp, sodan 23 jasymda elge aman-esen oraldym», - dedi ardager Jaqan Seısebaev.
Arnaıy uıymdastyrylǵan kontsertte shyrqalǵan ánder ardagerlerdiń birine sol surapyl kezderdi eske salsa, endi biri egde jasyna qaramastan, mýzykanyń yrǵaǵyna ilesip bıleı bastady.
«Sol jyldardaǵy áýenderdi estigende, meniń keýdemdi qýanysh sezimi kerneıdi. Bul ánderdi kezinde ózim de oryndaǵan edim», - dep eske aldy elordalyq ardager Vladımır Drovosekov.
Qalalyq jastar saıasaty máseleleri basqarmasynyń basshysy Baǵdat Atymtaı búgin ár ardagerde osyndaı erekshe qurmet kórsetiletinin atap ótti.
«Biz búgin ardagerlerimizdi erekshe formatta quttyqtaýdy jón dep sheshtik. Osylaısha, maıdangerlerdiń aýlasynda soǵys jyldaryndaǵy áýenderdi oryndaıtyn orkestrdiń qoıylymy uıymdastyryldy. Bul — aramyzda júrgen jáne ómirden ozǵan ardagerlerimizge degen sheksiz qurmet. Mundaı is-sharalar ardagerler turatyn barlyq úılerde ótkiziledi» - dep málim etti Astana qalalyq jastar saıasaty máseleleri basqarmasynyń basshysy Baǵdat Atymtaı.
