Kóshpeli mal sharýashylyǵyn damytýǵa arnalǵan biryńǵaı kredıttik ónim iske qosylady
ASTANA. KAZINFORM – Aýyl sharýashylyǵy mınıstri Aıdarbek Saparovtyń tóraǵalyǵymen ótken keńeste 2026–2030 jyldarǵa arnalǵan mal sharýashylyǵyn damytýdyń keshendi josparynyń jobasy talqylandy.
Keńeske oblys ákimderiniń orynbasarlary, salalyq memlekettik organdar men salalyq birlestikterdiń ókilderi qatysty.
Mınıstr Memleket basshysy 2025 jylǵy Joldaýynda mal sharýashylyǵy salasyndaǵy agrobıznesti qoldaýdyń zamanaýı qarjylyq tetikterine basymdyq bere otyryp, júıeli ári tıimdi keshendi jospar qalyptastyrý mindetin qoıǵanyn atap ótti.
- Óńirlerdiń ókilderi de kiretin jumys toby quryldy. AÓK damytý máseleleri jónindegi Qoǵamdyq keńestiń otyrysyn qosa alǵanda, 12 otyrys ótkizildi. Jospar jobasy tolyq daıyn. Onyń negizgi maqsattary — aýyl sharýashylyǵy janýarlarynyń basyn kóbeıtý, olardyń ónimdiligin arttyrý jáne óndiris kólemin ulǵaıtý. Bul mindetterdi iske asyrý jergilikti atqarýshy organdardyń belsendi qatysýynsyz múmkin emes, — dedi Aıdarbek Saparov.
Keshendi jospardyń basty basymdyǵy — salany qoljetimdi qarjylyq resýrstarmen qamtamasyz etý. Atap aıtqanda, aýyl sharýashylyǵy janýarlarynyń barlyq túrleri boıynsha asyl tuqymdy mal satyp alýǵa jyldyq 6% mólsherlememen uzaq merzimdi jeńildetilgen kredıtteý baǵdarlamasyn iske qosý josparlanyp otyr.
Sondaı-aq mal sharýashylyǵy baǵyttary boıynsha shekteýsiz aınalym qarajatyn tolyqtyrýǵa arnalǵan jyldyq 5% mólsherlememen jeńildetilgen kredıtteý baǵdarlamasy kózdelgen. Bul qarajat jem-shóp, janar-jaǵarmaı materıaldary, veterınarııalyq preparattar satyp alýǵa jáne ózge de aǵymdaǵy qajettilikterge baǵyttalýy múmkin. Atalǵan tetik 2025 jylǵy qyrkúıekten bastap bordaqylaý alańdary men qus fabrıkalarynda sátti qoldanylyp keledi.
Kóshpeli mal sharýashylyǵyn damytýǵa erekshe nazar aýdaryldy. Paıdalanylmaı jatqan jaıylymdyq jerlerdi aınalymǵa tartý maqsatynda jyldyq 6% mólsherlememen biryńǵaı kredıttik ónimdi iske qosý josparlanýda. Qarjylandyrý jaıylymdardy sýlandyrýǵa, ınfraqurylymdy damytýǵa, mobıldi vagonchıkter satyp alýǵa jáne basqa da qajetti sharalarǵa baǵyttalady. Qazirgi tańda mundaı jobalar Qostanaı oblysynda jáne Ulytaý oblysynda tabysty iske asyrylyp jatyr.
Qarjylandyrýǵa qoljetimdilikti keńeıtý úshin óńirlik áleýmettik-kásipkerlik korporatsııalardy belsendi tartý kózdelip otyr. Barlyq kredıttik baǵdarlamalar «Damý» ınstıtýty arqyly kepildik berý júıesimen súıemeldenedi — ósimdik sharýashylyǵynda qoldanylyp júrgen tetikterge uqsas.
Salanyń ónimdiligin arttyrý maqsatynda qujatta zamanaýı kóbeıtý tehnologııalaryn damytý qarastyrylǵan. Atap aıtqanda, iri qara maldyń embrıondyq kóbeıtýine arnalǵan mamandandyrylǵan zerthana qurý pysyqtalýda. Bul joǵary ónimdi mal basyn jedel qalyptastyrýǵa jáne otandyq maldyń genetıkalyq áleýetin nyǵaıtýǵa múmkindik beredi.
Sharalardyń jeke blogy kadrlyq qamtamasyz etýge, mal sharýashylyǵy qyzmetkerleri úshin áleýmettik jaǵdaılar jasaýǵa, veterınarııalyq qaýipsizdikti kúsheıtýge jáne veterınarııalyq ınfraqurylymdy jańǵyrtýǵa arnalǵan. Sonymen qatar, mal sharýashylyǵy ónimderiniń eksporttyq múmkindikterin odan ári keńeıtý josparlanýda.
Talqylaý barysynda oblys ákimderiniń orynbasarlary kredıttik baǵdarlamalardy iske qosý merzimderi men olardy qarjylandyrý tetikterine qatysty suraqtar qoıdy.
Óńir ókilderi qujattyń júıeliligi men praktıkalyq baǵyttylyǵyn atap ótip, onyń salany damytý men aýyl halqynyń ál-aýqatyn arttyrýdyń tıimdi quraly bolatynyna senim bildirdi.
Keńes qorytyndysynda maldy qystatýdy uıymdasqan túrde ótkizý, AÓK-ti damytýǵa arnalǵan jergilikti bıýdjetterdi bekitý jáne kóktemgi dala jumystaryna daıyndyq máseleleri de talqylandy.
Aıta ketelik balyq resýrstary jáne basqa da sý janýarlary derıvattarynyń tizbesi bekitildi.