Kóshkin 17 adamnyń ómirin qıyp ketti, qar astynda onshaqty adam qalýy múmkin
ASTANA. QazAqparat - Úndistannyń soltústigindegi Kýpvara-Tandhar tas jolynda iri qar kóshkini júrip kem degende 17 adam qaza tapty, dep habarlaıdy «QazAqparat» HAA TASS-qa silteme jasap.
Jergilikti polıtsııa habarlaǵandaı, juma kúni 500 metr bıiktikten qulaǵan qar kóshkini men tas kesekteriniń astynda 30-ǵa jýyq adam qalǵan. Ekinshi táýlik boıy júrgizilip jatqan qutqarý jumystary barysynda 17 adamnyń denesi tabyldy, onyń ishinde bir jasar sábı de bar.
Qutqarýshylar tórt adamdy tirideı qutqaryp aldy, olardyń bireýi qar qursaýynda 12 saǵat jatqan.
Kýágerlerdiń aıtýynsha, kóshkinniń astynda áli onshaqty adam bar bolýy múmkin.
Shtattyń tabıǵı apattarmen kúres mınıstri Djavaıd Mýstafa opat bolǵandardyń otbasyna 400 myń rýpıı kóleminde (6 myń dollar) tólemaqy beriletinin aıtty.
Oqıǵa jergilikti halyq arasynda narazylyq týdyryp jatyr. 10 shaqyrymdyq týnnel salyp bere almaǵandyqtan, jergilikti jurt úkimettiń osy aımaqqa degen nemquraılylyǵyn synǵa aldy. Karna jáne Kýpvara qalalaryn baılanystyratyn 70 shaqyrymdyq tas jol qys aılarynda eń qaýipti aýmaqqa aınalady eken. Keltirilgen málimetke sáıkes, sońǵy 10 jylda osy taýly óńirdegi qaýipti tas joldyń boıynda 300-deı adam opat bolǵan.
