Qoshqarata ózeni arnasynan tasýy múmkin
ShYMKENT. KAZINFORM — Shymkentte ekinshi táýlik qatarynan aýa raıyna baılanysty tótenshe jaǵdaı rejımi saqtalyp otyr.
Aldymen nóser jaýyn jaýyp, sońy qarǵa ulassa, qazir qaıtadan jańbyr kúsheıdi. Sonyń áserinen elektr jelileri júktemeni kótere almaı, aǵashtar qulap, kóshelerde sý kólkip ketken. Buǵan qosa endi Qoshqarata ózeni arnasynan tasýy yqtımal.
Kúnniń kúrt jylynýy qardyń erýin jedeldetip, jaýyn-shashyn káriz júıeleri men ózen arnalaryna túsetin salmaqty eseledi. Qalanyń ortalyq kóshelerin sý basyp, avtokólikterdiń qozǵalysy qıyndady. Al jaıaý júrginshiler tereń shalshyqtardy aınalyp ótýge májbúr.
Osyǵan qatysty áleýmettik jelilerde turǵyndardyń shaǵym aıtqan beınejazbalary tarady. Turǵyndar qulaǵan aǵashtardy jedel tazartýdy, elektr jaryǵyn qalpyna keltirýdi jáne joldy shaıyp jatqan sýdyń máselesin sheshýdi talap etti.
Ásirese Qoshqarata ózeniniń boıynda turatyn turǵyndar alańdaýly. Olardyń aıtýynsha, Arǵynbekov pen Ótegenov kósheleriniń qıylysynda sý deńgeıi aıtarlyqtaı kóterilip, aýlalardy sý basa bastaǵan.
— Adamdardyń ómirine, múlkine qaýip tónip tur. Birneshe jyldan beri asfalt tóselmegen, avtokólik pen jaıaý júrginshilerge arnalǵan kópir salýdy suraımyz. Kóktaıǵaq saldarynan kólikter syrǵyp, ózenge qulap ketýi ábden múmkin. Jaýapty mekemelerdiń bul áreketsizdigi úılerdi sý basý qaýpin kúsheıtip otyr, — deıdi jergilikti turǵyndar.
Abaı aýdany ákimdiginiń habarlaýynsha, qolaısyz aýa raıyna baılanysty ózenniń arnasynan shyǵý qaýpi bar. Qazirgi ýaqytta kommýnaldyq qyzmetter ózen jaǵalaýyn bekitip, sý deńgeıin baqylaýda ustap otyr.
— Ótegenov kóshesi men oǵan jaqyn mańdaǵy kóshelerdiń turǵyndarynan qaýipsizdik sharalaryn saqtaýdy, avtokólikterdi qaýipsiz oryndarǵa qoıýdy jáne múlikteriniń saqtalýyn qamtamasyz etýdi suraımyz, — dep málimdedi aýdan ákimdigi.
Qalada elektr jelilerindegi apattardyń saldaryn joıý jumystary jalǵasyp jatyr. Dymqyl qardan aǵash butaqtary ıilip, elektr jelilerine tıip, qysqa tuıyqtalý men jaryqtyń óshýine sebep bolǵan.
«Ońtústik Jaryq Tranzıt» mekemesiniń málimetinshe, apattyq brıgadalar kúsheıtilgen rejımde jumys istep jatyr. Zaqymdalǵan ýchaskelerde aqaýlardy anyqtaý jáne joıý jumystary báseńsigen joq. Qosymsha tehnıka men mamandar tartylyp, elektrmen jabdyqtaýdy múmkindiginshe qysqa merzimde qalpyna keltirý sharalary qabyldanyp jatyr.
Budan buryn Shymkentte tolassyz jaýyn-shashynnan keıin kóshelerdi qar men sý basqanyn jazǵan edik.
Aý raıynyń nasharlaýynan kópqabatty turǵyn úıdiń aýlasynda ústine aǵash qulaǵan 10 jastaǵy balanyń ólimi boıynsha qylmystyq is qozǵaldy.