Qoshqar kóterýden rekord jasaǵan Azamat Maqulbekov «Tolaǵaı» alyptar saıysynda jeńimpaz atandy
Qala ákimdiginiń aldyndaǵy ortalyq alańǵa tórt kıiz úı tigilip, ortasyna shaǵyn sahna ornatylypty. Boıyndaǵy bula kúshke sengen 15 azamat sol kıiz úılerden jurt nazaryn tikken saıys aýmaǵyna kezek-kezek shyǵyp jatty.
Úmitkerler arasynda Qonaev qalasynan kelgen paýerlıftıng sheberi de, Arys qalasynan kelgen qazaq kúresiniń balýany da, belbeý kúresinen Álem chempıony da, Aqtóbeden kelgen qoıyn-qoltyq urys sheberi de, ziltemir kóterip júrgen kánigi aýyr atlet te, grek-rım kúresiniń maıtalmandary da boldy.
«Tolaǵaı» alyptar baıqaýy jobasynyń avtory Temir Sypataıdyń aıtýynsha, mundaı respýblıkalyq deńgeıdegi týrnır osymen tórtinshi ret ótip otyr.
«Bul jolǵy baıqaýdy Astananyń 25 jyldyǵyna oraılastyryp, qalanyń ashyq týrnıri retinde ótkizip otyrmyz. Munda baq synaýshylardyń arasynda kánigi sport sheberleri de, bazarda arba súırep júrgen qara kúsh ıeleri de bar. Jobanyń maqsaty - Qajymuqannyń búgingi izbasarlaryn elge pash etip, buqaralyq sportty nasıhattaý. Saıystyń birinshi oryn ıegerine 1 mln teńge syıaqy beriledi. Qalǵan júldegerlerge de aqshalaı syılyq bar. Onyń bárin Astana qalasynyń ákimdigi usynyp otyr. Sondaı-aq, «Chempıon» brendiniń negizin qalaýshy Serik Baıjanov ta demeýshilik qoldaý bildirdi. Osy baıqaýda top jarǵan baýyrlarymyzdy keleshekte álemdik deńgeıdegi alyptar saıysyna aparsaq degen armanymyz bar», - deıdi ol.
Saıys bes kezeńde ótti. Birinshi kezeńde alyptar 141 keli tasty 1 mınýttyń ishinde meılinshe uzaq jerge kóterip jetkizý kerek boldy. Odan keıin úmitkerler salmaǵy 10 keli naızany alysqa laqtyryp saıysty. Úshinshi kezeńde uzyndyǵy 1,5 metrlik temir bileýdi jelkege salyp ııýden kúsh synasty. Budan keıin alyp kúsh ıeleri salmaǵy 130 keli bolatyn bóreneni kóterip, otyryp-turýdan baq synady. Aqyrǵy kezeńde apaıtós jigitterge ústine 500 keli júk artylǵan arbany qum tóselgen jolmen 30 metr qashyqtyqqa barynsha jyldam jaıaý súırep aparý kerek boldy.
Bes saıystyń qorytyndysy boıynsha 120 upaı jınaǵan shymkenttik Nurǵısa Ádiletuly úshinshi oryn ıelendi. Ekinshi oryn bes kezeńde jıyny 122 upaı ıelengen Qonaev qalasynyń sportshysy Vaıd Teńizbaevqa buıyrdy. Al jarys jeńimpazy atanǵan Azamat Maqulbekovtiń enshisinde bes kezeńniń qorytyndysy boıynsha 132 upaı boldy. Jeńimpazǵa «Tolaı» alyptar saıysynyń jeńimpazyna beriletin altyn belbeýmen birge 1 mln teńgeniń syıaqysy tabystaldy.
Eske salsaq, jýyqta ǵana Azamat Maqulbekov qoshqardy 3555 ret kóterip, Qazaqstannyń rekordtar kitabyna engen bolatyn.
