«Qoshqar-Atada» radıatsııalyq qaýip joq: 843 myń sekseýil otyrǵyzyldy
AQTAÝ. KAZINFORM — Mańǵystaýda «Qoshqar-Ata» radıatsııalyq qaldyqtar qoımasynyń aýmaǵynda radıatsııa belgilengen normadan aspaıdy. Degenmen nysandy tolyq qalpyna keltirý jumystary áli aıaqtalǵan joq. Qazir qaldyq qoımasynyń aınalasyna jasyl beldeý qalyptastyrylyp, ekologııalyq jaǵdaı turaqty baqylaýǵa alynǵan.
Mańǵystaý oblystyq tabıǵı resýrstar jáne tabıǵatty paıdalanýdy retteý basqarmasynyń málimetinshe, 2024 jyly júrgizilgen keshendi zertteý jumystary nátıjesinde «Qoshqar-Ata» aýmaǵynda shekti deńgeıden asatyn radıoaktıvti lastaný anyqtalmaǵan. Zertteý qorytyndysy boıynsha aýmaqta bıologııalyq qalpyna keltirý jumystaryn júrgizý usynylǵan.
Sonymen qatar Qazaqstan Respýblıkasynyń Ulttyq ıadrolyq ortalyǵy júrgizgen zertteýler de qazirgi ýaqytta qaldyq qoımasy aýmaǵynan turǵyndar men qorshaǵan ortaǵa radıatsııalyq, hımııalyq nemese shań arqyly jol berilmeıtin qaýip anyqtalmaǵanyn kórsetken.
Zertteý kezinde qaldyq qoımasynyń ózindegi jáne oǵan jaqyn aýmaqtardaǵy radıatsııa deńgeıi, radıoaktıvti jáne hımııalyq zattardyń taralýy, sondaı-aq shańnyń qorshaǵan ortaǵa yqtımal áseri baǵalanǵan. Mamandar turǵyndardyń densaýlyǵyna tikeleı qaýip tóndiretin radıatsııalyq jaǵdaı tirkelmegenin aıtady. Radıatsııalyq fon belgilengen normatıvter sheginde bolǵan.
Alaıda bul qaldyq qoımasyn baqylaý qajet emes degendi bildirmeıdi. Kerisinshe, mamandar onyń ekologııalyq jaǵdaıyn turaqty baqylaýda ustaý qajet ekenin atap otyr.
— Qazir «Qoshqar-Ata» qaldyq qoımasynyń aınalasynda jasyl qorǵaý beldeýin qalyptastyrý jumystary júrip jatyr. Jalpy 878,2 gektar aýmaqta jasyl beldeý jasaý josparlanǵan. Qazirgi ýaqytta aýmaq tolyq qorshalǵan jáne 843 myń túp sekseýil kósheti otyrǵyzylǵan.Jasyl beldeý qaldyq qoımasynan taraýy múmkin shańnyń áserin azaıtý jáne aýmaqty qaýipsizdendirý maqsatynda qalyptastyrylyp jatyr. Jumystar 2027 jyldyń sońyna deıin jalǵasady, — delingen habarlamada.
Qaldyq qoımasynyń qorshaǵan ortaǵa áserin tolyq baǵalaý úshin topyraqqa, jerústi jáne jerasty sýlaryna keshendi zertteý júrgizý josparlanyp otyr. Osy maqsatta bıýdjetten qarjy bólýge ótinim berilgen. Qarajat bólinse, zertteý jumystary bir jyl boıy júrgiziledi.
Buǵan deıin, Aqtaýda 2,5 myńnan astam aǵash jersinbeı qalǵanyn jazǵan bolatynbyz.
