Qoshqar ata ýly qaldyqtar qoımasynyń aınalasy kógaldandyrylady - mınıstrlik

AQTAÝ. KAZINFORM — Ekologııa jáne tabıǵı resýrstar mınıstrligi Qoshqar ata ýly kóliniń keleshegine qatysty resmı saýalǵa jaýap berdi. Vıtse-mınıstr Jomart Álıevtiń aıtýynsha, radıatsııalyq qaldyq qoımasyn bıologııalyq rekýltıvatsııalaý josparlanyp otyr. 

— Mańǵystaý oblysy ákimdigi «Qoshqar ata» radıatsııalyq qaldyq qoımasyna júrgizilgen qosymsha zertteý nátıjesine baılanysty qalpyna keltirý jumysyn toqtatty. Sonymen qatar, atalǵan zertteýdiń qorytyndysyna qaraı qaldyq qoımasynyń aınalasyn kógaldandyrý jóninde sheshim qabyldandy, — deıdi vıtse-mınıstr.

Kógaldandyrý úshin endi arnaıy joba jasaqtalyp, qarjylandyrý kózderi anyqtalmaq.

— Bıyl bıologııalyq rekýltıvatsııa jobasynyń jobalaý-smetalyq qujattamany ázirleý arqyly memlekettik saraptamanyń oń qorytyndysyn alamyz dep kútip otyrmyz. Atalǵan joba arqyly qaldyq qoımasyn bıologııalyq rekýltıvatsııalaý jónindegi búkil jumystyń quny belgilenedi, onyń negizinde qarjylandyrý kózderi aıqyndalady, — deıdi Ekologııa jáne tabıǵı resýrstar vıtse-mınıstri Jomart Álıev. 

Aıta keteıik, Qoshqar ata ýly kólinde belsendiligi joǵary radıoaktıvti 150 mıllıon tonna qaldyq jınalǵan.

Onyń ishinde ýran rýdasy — 51,8 mln tonna. Al, onyń zardabyn aınalasynda turatyn 400 myńǵa jýyq halyq tartyp otyr.

Buǵan deıin 52 mln tonna ýran qaldyǵy jatqan «Qoshqar ata» radıatsııalyq qoımasynyń keleshegi týraly jazǵanbyz.