«Qoshqar ata» radıoaktıvti qaldyqtar polıgonynda rekýltıvatsııa jumysy qaıta bastaldy

AQTAÝ. QazAqparat – Aqtaý janyndaǵy «Qoshqar ata» radıoaktıvti qaldyqtar polıgonynda jerdi qalpyna keltirý jumystary qaıta bastaldy. Bul týraly Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynan málim etti, dep habarlaıdy QazAqparat tilshisi.

Jalpy aýmaǵy 6600 gektardy quraıtyn «Qoshqar ata» qaldyq qoımasyndaǵy álsiz radıoaktıvti qaldyqtardyń topyraq betinde ornalasýy mańaıdaǵy 3 eldi mekenge qaýip tóndirip tur. Aýyldarda 372 myń adam turady. 30 jyldan asa ýaqyt máselege aınalǵan qaldyq ornyn rekýltıvatsııadan ótkizý jyl basynda bastalǵan edi. Respýblıkalyq bıýdjetten 3 mlrd teńge bólinip, 905 ga jerge rekýltıvatsııa jasaldy. Biraq bul jumystarǵa tólem jasalmaǵan.

2022 jyldyń 11 sáýirinde jobaǵa túzetý engizý týraly úshjaqty memorandýmǵa qol qoıylyp, túzetý jumystaryn tóleý merdiger esebinen ótelgen. Nátıjesinde 2022 jylǵy 19 tamyzda «Qoshqar-ata qaldyq qoımasyn rekýltıvatsııalaýdyń» І kezeńi boıynsha memlekettik saraptamanyń jáne memlekettik ekologııa saraptamasynyń oń qorytyndysy alynǵan.

«Mańǵystaý oblysynyń ákimdigimen osy jyldyń 28 aqpanynda «Qoshqar-ata» qaldyq qoımasyn rekýltıvatsııalaýdyń I kezeńindegi jobasyna túzetý engizý boıynsha tehnıkalyq jınalys ótkizdik. Endi merdiger mekeme qaldyq qoımasynan 2,5 shaqyrym jerde ornalasqan karerden topyraqty tasymaldaýǵa kóshti. Jumys josparǵa sáıkes júredi. Aldaǵy jyldarǵa ákimdik tarapynan suratylǵan qarajat qoldaý tapty», - dedi Mańǵystaý oblystyq tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekov.

Aıta keteıik, 2021 jyly 10 qarashada respýblıkalyq bıýdjetten 1,0 mlrd teńge aýdarylyp, rekýltıvatsııa jumystary jasalǵan edi. Oǵan 30 arnaıy tehnıka men 70-ke tarta adam jumyldyrylǵan. Nátıjesinde 266,2 ga jerge 819,3 myń m3 topyraq tógildi.

Foto: mangystautv.kz