Qoshqar ata kólin qalpyna keltirýge bólingen qarajat bıýdjetke nege qaıtaryldy
ASTANA. KAZINFORM — Májilistiń jalpy otyrysynda depýtat Samat Musabaev Ekologııa jáne tabıǵı resýrstar mınıstri Erlan Nysanbaevtan Mańǵystaý oblysyndaǵy Qoshqar ata ýly qaldyqtar kólin qalpyna keltirý jumystaryna bólgen qarjy kimniń pármenimen bıýdjetke qaıtarylǵanyn surady.
— Mańǵystaý oblysyndaǵy Qoshqar ata kólindegi ýly qaldyqtardy rekýltıvatsııa jasaý jumystaryna bólingen 8,3 mlrd teńge ıgerilmeı qaldy. Prezıdent bir emes, úsh ret Qaýlymen tapsyrma berdi. Jobalyq smetasy saraptamadan oń qorytyndysyn alyp, úsh jyldyq bıýdjet bekitildi. 2024 jylǵa ǵana 8,3 mlrd teńge bólindi. Merdiger de anyqtalyp, 6 aıdan keıin jumysty toqtatyp, 8,3 mlrd teńgeni keri qaıtaryp aldyńyzdar. Osy kimniń pármenimen isteldi, kim buǵan buıryq berdi, — dep surady ol.
Mınıstr Erlan Nysanbaev munyń sebebin kóldiń ekojúıesine júrgizilgen qosymsha zertteýlermen baılanystyrdy.
— 2024 jylǵa qarastyrylǵan qarajatty bıýdjetke qaıtarýdyń birden-bir sebebi — mamyr aıynda Mańǵystaý oblysy ákimdiginiń qosymsha qosymsha zertteý jumystaryn júrgizgen. Sol sebepten qaldyq qoımasyn qalpyna keltirý jumystary toqtatylǵan soń qarajatty bıýdjetke keri qaıtardy. Qazir zertteý jumystary aıaqtalyp, jobalaý-smetalyq qujattarǵa ózgerister engizilip jatyr. Jyldyń aıaǵyna deıin memlekettik saraptamadan oń qorytyndy alady dep otyrmyz. Zertteý nátıjesin eskerilgen bıýdjeti belgilengen soń osy nysanǵa qarajat bólýdi qarastyramyz, — dedi mınıstr.
Jalpy Mańǵystaýdaǵy Qoshqar ata ýly qaldyqtar qoımasyn qalpyna keltirý jumystaryna 49,5 mıllıard teńge qajet degen esep bar.