Qoshqar ata qaldyqtar qoımasyn qalpyna keltirýge bólinetin qarjy kólemi belgili boldy
Bul týraly búgin elordada ótip jatqan Azııadaǵy ıadrolyq kooperatsııalar forýmynyń mınıstrler deńgeıindegi 18-keńesi aıasynda BAQ ókilderine suhbat bergen QR Energetıka mınıstri Qanat Bozymbaev aıtty, dep habarlaıdy QazAqparat.
«Birinshi kezekte kelesi jyldan bastap respýblıkalyq bıýdjet qarajaty esebinen jańa jobany qolǵa alamyz. Ol - Mańǵystaý oblysyndaǵy Qoshqar ata qaldyqtar qoımasyn qalpyna keltirý. Tehnıkalyq ekonomıkalyq negizdemesi, jobalyq-smetalyq qujattamasy ázirlenip, joba respýblıkalyq bıýdjettik komıssııada qoldaýǵa ıe boldy. Úkimet te qoldap otyr. Endi sońǵy sóz Májilis pen Senattyń enshisinde. Atalǵan soma bıýdjette bekitiletin bolsa, onda kelesi jyldyń qańtarynan biz nemese ákimdik qyzmetterdi satyp alý boıynsha sáıkesinshe bıýdjettik protsedýralardy bastap, kómý jáne qalpyna keltirý boıynsha qajetti jumystar júrgiziledi», - dedi mınıstr.
Onyń aıtýynsha, atalǵan maqsatqa kelesi jyly shamamen 1 mlrd 700 myń teńge bólinýi tıis.
«Bul baǵdarlama bir jyldyq emes. Birneshe jylǵa jalǵasady. Biz bul máselemen kezeń-kezeń boıynsha aınalysamyz», - dedi mınıstr.
Aıta keteıik, Ál-Farabı atyndaǵy Qazaq Ulttyq ýnıversıteti mamandary júrgizgen ǵylymı zertteýler nátıjesine sáıkes, Qoshqar ata qoımasynda 105 mln tonnadan astam ýly qaldyq kómilgen. Onyń shamamen 52 mln tonnasy radıoaktıvti.
