«Qoshqar-Ata» qaldyqtar qoımasyna qatysty túıtkil sheshimin tappaı keledi — Prezıdent

ASTANA. KAZINFORM — Qasym-Jomart Toqaev óndiris oryndarynyń ekologııa talaptaryn mindetti túrde saqtaýǵa tıis ekenin alǵa tartty, dep habarlaıdy Aqordanyń baspasóz qyzmeti.

Onyń sózinshe, aımaqtaǵy ekologııa máselesin sheshýge erekshe kóńil bólý qajet.

— Aımaqtaǵy ekologııa máselesin sheshýge erekshe kóńil bólý qajet. Oblys ortalyǵynyń mańaıynda ónerkásiptik kásiporyndar kóp. Olar mindetti túrde ekologııa talaptaryn saqtaýǵa tıis. «Qoshqar-Ata» qaldyqtar qoımasyna qatysty túıtkil talaıdan beri sheshimin tappaı keledi. Onda Kaspıı mańy taý-ken metallýrgııa kombınatyna qarasty 3 zaýyttan shyqqan 105 mıllıon tonna qaldyq jatyr, — dedi Prezıdent.

Sonymen qatar Memleket basshysy ruqsat etilmegen jerge zańsyz tastalǵan qoqystar máselesin shuǵyl sheshý úshin Úkimet oblys ákimdigimen birge qajetti sharalardy qabyldaýy tıis ekenin aıtty. Endi Úkimet toqsan saıyn bul másele boıynsha Prezıdentke tikeleı baıandama jasap otyrady.

— Budan bólek, aımaqtaǵy polıgondarda 200 myń tonnadan astam qoqys jınalyp qalǵan. Ruqsat etilmegen jerge zańsyz tastalǵan qoqystar da kóp. Jalpy oblysta qoqys tastaıtyn 68 ruqsat etilmegen oryn bar. Onyń alpysy joıyldy, segizi kásipkerlerge tıesili jerde ornalasqan. Munyń bári halyqtyń turmys sapasyna keri áserin tıgizip otyr. Osy máselelerdi shuǵyl sheshý úshin Úkimet oblys ákimdigimen birge qajetti sharalardy qabyldaýǵa tıis. Bul másele boıynsha Úkimet toqsan saıyn maǵan tikeleı baıandaýy kerek. «Taza Qazaqstan» aktsııasy aıasynda eldi mekenderdi abattandyrý isin jalǵastyrý qajet. Aqtaýda aǵashtardy kóbirek otyrǵyzýǵa tyrysý kerek. «Taza» degen — kıeli sóz, asa mańyzdy uǵym. Bul uǵym halqymyzdyń bolmysynyń bir bóligi bolýy qajet, — dedi Toqaev.

Aıta keteıik, Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes ótip jatyr.

Memleket basshysy Úkimet pen «Samuryq-Qazyna» qoryna aımaqtaǵy sý tapshylyǵyn azaıtý úshin naqty sheshim qabyldaýdy tapsyrdy.

Toqaev Jańaózendegi gaz óńdeý zaýyty qurylysynyń keshigýi — Úkimettiń óreskel olqylyǵy ekenin aıtty.

Sondaı-aq Prezıdent Aqtaý sý qubyry jelisiniń tozýyna baılanysty sýdyń 16 paıyzy ysyrap bolyp jatqanyn atap ótti.