«Qoshqar ata» qaldyq qoımasynyń smetasy qaıta qaralýda

  Mańǵystaý oblysynyń ákimi Nurlan Noǵaev «Qoshqar ata» qaldyq qoımasynyń qazirgi jaı-kúıi týraly aıtyp berdi, dep habarlaıdy Kazinform.

«Kópten aıtylyp júrgen másele – «Qoshqar ata» qaldyq qoımasy. Bul jerge 150 mln tonna qaldyq tógilgen. Kezinde joba jasalǵan bolatyn. Byltyrdan beri materıaldardyń qymbattaýyna jáne basqa da sebepterge baılanysty jobalyq-smetalyq qujattamany qaıta túzetý sheshimi qabyldandy. Jeltoqsan aıynda osy joba memlekettik saraptamadan shyǵady. Kelesi jyly osy jumysymyzdy jalǵastyramyz», - dedi N. Noǵaev Ortalyq kommýnıkatsııalar qyzmetinde.

Ákimniń tolyqtyrýynsha, ondaǵy rekýltıvatsııaǵa 17 mlrd teńge bólingen. Qazirgi jobalyq-smetalyq qujattama taǵy 32 mlrd teńgege qymbattady. Barlyǵy 49 mlrd teńge josparlanǵan jáne saraptamadan keıin naqty baǵasy belgili bolady.

Sondaı-aq, Mańǵystaý oblysy ákimdiginiń habarlaýynsha, qoımanyń aınalasyna jergilikti bıýdjet esebinen 80 gektar jerge 200 myń qara sekseýil otyrǵyzý jumystary júrgizilýde. Jalpy 150 gektar jerge aǵash egý josparlanǵan.

Buǵan deıin Mańǵystaýdaǵy Qoshqar ata ýly qaldyqtar qoımasyn qalpyna keltirý jumystaryna 49,5 mıllıard teńge qarastyrylǵany aıtylǵan edi. Bul jóninde oblystyq tabıǵı resýrstar jáne tabıǵat paıdalanýdy retteý basqarmasynyń basshysy Ásel Balmanova suhbat berdi.