Kóshirme-kóbeıtý qyzmeti 10 teńge bolady - HQKO
ASTANA. QazAqparat - Halyqqa qyzmet kórsetý ortalyqtarynyń 11 fılıalynda pılottyq joba aıasynda kóshirme apparattary ornatyldy. Endi halyqqa qyzmet kórsetý ortalyqtarynda klıentterge kóshirme-kóbeıtý qyzmetteri arzan baǵada bolady.
Buryn mundaı qyzmetti tek HQKO aýmaǵynda óz apparattaryn ornatqan jeke kásipkerler kórsetetin edi, onda baǵasy 1 paraqqa 20-30 teńge bolǵan, al keıbir oblystarda bir kóshirme 60 teńgege deıin barǵan.
«Biz halyqqa qyzmet kórsetý ortalyqtarynda servıstiń sapasyn arttyrýǵa mindettimiz. Kóshirme-kóbeıtý pýnktteri qyzmetiniń qunyna tek qajet materıaldar men jumysty uıymdastyrý shyǵynyn ǵana qosamyz. Endi onyń baǵasy 10 teńge bolady», - dedi QR Baılanys jáne aqparat agenttigi tóraǵasynyń birinshi orynbasary Sáken Sársenov. 2014 jyldyń úshinshi toqsany sońyna deıin «HQKO» RMK kóshirme-kóbeıtý qyzmetteriniń taǵy da 48 orynyn ashý josparlanyp otyr. HQKO jańa servısi Pavlodar, Soltústik Qazaqstan, Jambyl, Almaty, Ońtústik Qazaqstan, Aqmola jáne basqa oblystarda uıymdastyryldy.
