Kóshi-qon jáne Ákimshilik polıtsııa komıtetteri taratylmaq

ASTANA. QazAqparat – Іshki ister mınıstrligine qarasty Ákimshilik polıtsııa men Kóshi-qon qyzmeti komıteti taratylýy múmkin. Bul týraly búgin ashyq talqyǵa shyǵarylǵan Úkimet qaýlysynda jazylǵan, dep habarlaıdy QazAqparat tilshisi.

Qazaqstan Respýblıkasy Ishki ister mınıstrliginiń Ákimshilik polıtsııa komıteti memlekettik mekemesi, Qazaqstan Respýblıkasy Ishki ister mınıstrliginiń Kóshi-qon qyzmeti komıteti memlekettik mekemesi taratylsyn. Bul QR Prezıdentiniń 2022 jylǵy 28 sáýirdegi Іshki ister mınıstrliginde basqa quqyq qorǵaý organdarymen (BP, SJQІA, UQK) uqsastyǵy boıynsha qyzmet qurý týraly tapsyrmasyn oryndaý aıasynda usynylyp otyr. Jobany qabyldaý quqyq qorǵaý qyzmetin ótkerýdi uıymdastyrý tásilderiniń birligi qaǵıdatyn iske asyrýǵa, qyzmetkerlerdi basqa quqyq qorǵaý organdarymen uqsastyǵy boıynsha áleýmettik jáne materıaldyq qamtamasyz etýdi birizdendirýge, derbestikti qamtamasyz ete otyryp, sheshimder qabyldaý kezinde olardyń basshylarynyń jaýapkershilik deńgeıin arttyra otyryp, ІІM-niń qaıta qurylǵan bólimsheleriniń jumysyn qaıta qurýǵa, osy laýazymdardy tájirıbesi mol bilikti kadrlarmen almastyrý úshin tartýǵa múmkindik beredi, -

delingen qujatta.

Qaýlyda kórsetilgendeı, bul isti júzege asyrýǵa memlekettik bıýdjetten qosymsha qarjat talap etilmeıdi. Komıtet tóraǵalary men olardyń orynbasarlarynyń eńbekaqy mólsheri men arnaýly ataqtary ózgerissiz qalady

Qujatty ashyq talqylaý 19 jeltoqsanǵa deıin jalǵasady.