Kóshi-qon zańnamasynyń jańa tujyrymdamasynda negizgi úsh baǵyt qarastyrylǵan - Eńbek mınıstrligi
ASTANA. QazAqparat - Búgin QR Eńbek jáne halyqty áleýmettik qorǵaý mınıstrliginde QR kóshi-qon zańnamasy tujyrymdamasynyń jobasy tanystyryldy.
Kóshi-qon komıteti tóraǵasynyń orynbasary Aslan Qarjaýbaevtyń aıtýynsha, tujyrymdama negizgi úsh baǵytty qamtıdy.
«Birinshisi, ishki kóshi-qon boıynsha. «Jol kartasy 2020» baǵdarlamasynyń aıasynda memleket tarapynan kórsetiletin áleýmettik paket keńeıtiledi: memleket jumys kúshi mol aımaqtardan halqynyń sany tapshy óńirlerge kóship barǵan azamattardy jumysqa ornalastyrý jáne baspanamen (qyzmettik páter nemese jataqhana) qamtamasyz etý úshin qoldaý kórsetedi. Sonymen qatar, bir rettik sýbsıdııa tólenedi (bes adamdyq otbasyǵa 190 AEK kóleminde)», - dep túsindirdi A. Qarjaýbaev.
Onyń aıtýynsha, ekinshi basym baǵyt etnıkalyq kóshi-qonǵa arnalǵan.
«Tujyrymdama jobasyna sáıkes etnıkalyq qazaqtardyń Qazaqstan Respýblıkasyna kelý jaǵdaıy birizdendiriledi jáne jeńildetiledi. Mindetti túrde turýǵa yhtııarhat alǵan kezde etnıkalyq qazaqtarǵa qonystanǵan óńirlerine qaramastan oralman mártebesin berý qarastyrylǵan. Shetel azamattaryna qaraǵanda, etnıkalyq qazaqtar turýǵa yqtııarhatty kóshi-qon polıtsııasyna júginip, tólem qabilettiligin rastamaı alady. Oralmandardyń QR azamattyǵyn alý merzimin bir jylǵa deıin qysqartý kózdeledi», - dep atap ótti tóraǵa orynbasary.
A. Qarjaýbaevtyń aıtýynsha, tujyrymdamadaǵy úshinshi mańyzdy baǵyt syrtqy kóshi-qonǵa arnalǵan.
«Tujyrymdama Qazaqstanda joǵary bilikti mamandardyń ashyq naryǵyn qalyptastyrýdyń birqatar mehanızmderin usynady. Birinshiden, óńdeý ónerkásibi, agrarlyq-ónerkásiptik keshen jáne geologııalyq barlaý kásiporyndaryna kapıtal salatyn transulttyq kompanııalar úshin erikti oryn aýystyrý prıntsıpi qarastyrylǵan. Sonymen birge qazaqstandyq mamandardy jumysqa alý jáne oqytý jónindegi sheteldik ınvestorlarǵa qoıylatyn talap saqtalady. Ekinshiden, jetispeı jatqan mamandar tizimin, olarǵa qatysty biliktilik talaptarymen qatar áleýetti jumysshylardy baldyq synaý júıesin engizý usynylady. Úshinshiden, Qazaqstannyń joǵary oqý oryndarynda daryndy sheteldik stýdentter úshin oqý granty júıesin engizý (Sıngapýr, Malaızııa, Ulybrıtanııa tájirıbesine sáıkes) jáne olardyń jumysqa ornalastyrylýy qarastyrylǵan», - dep atap ótti A. Qarjaýbaev.
