Kóshi-qon zańnamasyn buzǵan Shrı-Lankanyń tórt azamaty elden shyǵaryldy
Kóliktegi polıtsııa departamentiniń qyzmet kórsetý aýmaǵynda «Quqyqtyq tártip» jedel-profılaktıkalyq is-sharasynyń 3 kúni ishinde izin sýytpaı 11 qylmys ashyldy. Sondaı-aq myńnan asa ákimshilik quqyq buzýshylyq anyqtaldy. Onyń ishinde 40 usaq buzaqylyq faktisi, 200 qoǵamdyq oryndarda spırttik ishimdikter ishý deregi, 51 sheteldiktiń nemese azamattyǵy joq adamnyń kóshi-qon salasyndaǵy QR zańnamasyn buzǵany anyqtaldy.
Bul týraly departament bastyǵynyń birinshi orynbasary Madııar Aıtýǵanov habarlady. Onyń aıtýynsha, Oral stantsııasyndaǵy kólik polıtseıleri Shrı-Lanka Respýblıkasynyń tórt azamatyna qatysty Qazaqstan Respýblıkasynyń Kóshi-qon zańnamasyn buzý faktilerin tirkedi. Olar vızada kórsetilgen merzimde el aýmaǵynan shyǵýdan jaltarǵan.
«Quqyq buzýshylarǵa qatysty QR ÁQBtK-niń 517-baby 4-bóligi boıynsha ákimshilik materıaldar toltyryldy. Oral qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen sheteldik azamattarǵa 5 jyl merzimge Qazaqstan aýmaǵyna kirýge tyıym salý belgilenip, shekaradan tys jerge shyǵaryp jiberý túrinde jaýapqa tartyldy», – dedi M.Aıtýǵanov.
Aıta keteıik, Kóliktegi polıtsııa departamentiniń qyzmet kórsetý aýmaǵynda aǵymdaǵy jyldyń 9-11 qarasha aralyǵynda «Quqyqtyq tártip» jedel-profılaktıkalyq is-sharasy ótkizildi.
